კახა ბექაურმა კომუნიკაციების კომისია დატოვა

კახა ბექაურმა საქართველოს კომუნიკაციების ეროვნული კომისიის თავმჯდომარის პოსტი დატოვა. მას უფლებამოსილების ვადა ამოეწურა.

ბექაური კომუნიკაციების ხელმძღვანელის პოსტს 9 წლის განმავლობაში, 2 ვადით იკავებდა. ის კომუნიკაციების კომისიის წევრად 2014 წელს აირჩიეს, 2017 წლიდან კი თავმჯდომარე გახდა.

კახა ბექაური კომუნიკაციის კომისიის თავმჯდომარეობის პარალელურად ბიზნესსაქმიანობას ეწეოდა. ის ფლობს 33%-იან წილს სუპერმარკეტების ქსელ „ორ ნაბიჯში“.

ბოლო დეკლარაცია კახა ბექაურს 2025 წლის 30 მაისს აქვს ჩაბარებული. ბექაური ერთ-ერთი ყველაზე მაღალანაზღაურებადი საჯარო მოხელე იყო საქართველოში. ის ხელფასის სახით თვეში 16 ათას ლარს იღებდა.

დეკლარაციის მიხედვით, კახა ბექაური და მისი მეუღლე, ეკა ბერიძე, ფლობენ 21 ბინას, 14 მიწის ნაკვეთს, 7 ავტომობილს, 4 ძვირადღირებულ მაჯის საათს და 5 ცეცხლსასროლ იარაღს.

კახა ბექაური კომისიის თავმჯდომარის გარდა, წევრიც იყო.

ბექაური კომუნიკაციების კომისიის წევრის პოზიციაზე გოგა გულორდავამ ჩაანაცვლა.

გოგა გულორდავა კომუნიკაციების კომისიის წევრად სადავო პარლამენტმა დაამტკიცა და კანონით, ის მომდევნო 6 წლის განმავლობაში  იმუშავებს ამ პოზიციაზე.

Comcom-ის ვებგვერდზე გამოქვეყნებული ოფიციალური ბიოგრაფიის თანახმად, კომუნიკაციების კომისიის წევრობამდე, გოგა გულორდავა 2 წლის განმავლობაში ტელეკომპანია „იმედში“ ფინანსური მონიტორისა და აუდიტის პოზიციას იკავებდა. 2020 წლიდან 2025 წლამდე იყო  საქართველოს სახელმწიფო ელექტროსისტემაში გენერალური დირექტორის მრჩეველი, შემდგომ კი, ამავე უწყებაში, შიდა აუდიტის დირექტორი.

2016-2020 წლებში გოგა გულორდავა იყო საქართველოს პარლამენტის წევრი, ხოლო 2013-2016 წლებში – წალენჯიხის მუნიციპალიტეტის გამგებელი.