ზუგდიდელი აქტივისტი და არტისტი როსტო ზარანდია ზუგდიდის სასამართლომ სოფლის მეურნეობისა და გარემოს სამინისტროს გარემოსდაცვითი ზედამხედველობის სამსახურის საჩივრის საფუძველზე დააჯარიმა გეოგლიფის, „მეგობარი აქტის“ გამოსახვისთვის.
380 მეტრი სიგრძის გეოგლიფი 13 ნოემბერს გამოჩნდა ანაკლიის სანაპიროსთან. როსტომ და კიდევ ერთმა აქტივისტმა ანაკლიის პორტის პროექტის ტერიტორიასთან, მინდორზე, მასშტაბური წარწერა – Megobari act [მეგობარი აქტი] გამოსახეს.
380 მეტრი სიგრძის გეოგლიფის [გამოსახულება მიწაზე] მიზანი ადგილობრივი და საერთაშორისო საზოგადოებისთვის „მეგობარი აქტის“ მნიშვნელობის შეხსენება იყო, „მეგობარი აქტი“ სენატში კენჭისყრას ელოდება. კანონპროექტი კონგრესმენ ჯო უილსონის მიერაა მომზადებული.
ამ გეოგლიფის გამო როსტო ზარანდია აქამდე 2 ათასი ლარით დააჯარიმა ზუგდიდის მერიამ. ეს გადაწყვეტილება აქტივისტმა გაასაჩივრა.
დღეს, 13 იანვარს კი, მოსამართლე ირაკლი აფშილავამ აქტივისტს 1750 ლარი დააკისრა ჯარიმის სახით – „ნიადაგის ნაყოფიერი ფენის მოხსნა-გადაადგილებისთვის“.
„რა სასამართლო პროცესი? – ეს იყო მასხარაობა. რა მოხდა და არაფერი. ის, რომ ძალიან „სასტიკები“ ვართ და „უხეშად დავარღვიეთ“ მიწის ზედაპირის ერთიანობა, ძალიან მკაცრად უნდა დავსჯილიყავით, მაგრამ იმდენი ზიანიც არ დამდგარა .. მოკლედ იყო მასხარაობა მორიგი, დამაჯარიმეს“ – გვითხრა როსტო ზარანდიამ სასამართლო სხდომის დასრულების შემდეგ.
ზუგდიდელი სამოქალაქო აქტივისტი როსტო ზარანდია არაერთხელ დააჯარიმეს მზია ამაღლობელის სტენსილის დახატვის გამო.
