ბათუმის 79-ე ოლქის 63-ე უბანზე შემაჯამებელ ოქმში ბალანსი ვერ მიიღეს. ეს ის უბანია, სადაც დღის განმავლობაში რამდენიმე მარკირებაგავლილმა ამომრჩეველმა სცადა ხმის მიცემა. უბანზე მისულმა ოლქის წარმომადგენელმა კი თქვა, რომ მარკირების აპარატი მანდარინის სითხესაც აფიქსირებს.
კომისიის მონაცემებით, უბანზე ამომრჩეველთა საერთო რაოდენობამ შეადგინა 478. იმისთვის, რომ ბალანსი გასწორებულიყო, კომისიის მდივანმა და თავმჯდომარემ შემაჯამებელი ოქმში ბათილი ბიულეტენების რაოდენობა სპონტანურად გაზარდეს. მაგალითად, უმაღლესი საბჭოს არჩევნების შემაჯამებელ ოქმში 19 ბათილი ბიულეტენის ნაცვლად, ოქმში ჩაიწერა – 48, ხოლო პარლამენტის ოქმში 16 ბათილი ბიულეტენის ნაცვლად ჩაწერა 35. გარდა ამისა, ბათილი ბიულეტენების რაოდენობას კომისიის მდივანმა გამოყენებელი ბიულეტენების რაოდენობაც მიუმატა. შემაჯამებელ ოქმს კომისიის ყველა წევრმა ისე მოაწერა ხელი, რომ შეუსაბამობა არავის გაუპროტესტებია. ოქმის შედგენამდე კომისიის მდივანს საბოლოო მონაცემები არ შეუტანია სადემონსტრაციო ოქმშიც.
შემაჯამებელი ოქმის ასლების მოწოდების შემდეგ, უბანზე “ბათუმელებმა” კომისიის წევრებს დაუსვა შეკითხვა, როგორ გაიზარდა ბათილი ბიულეტენების რაოდენობა. იმის მიუხედავად, რომ დათვლილი ციფრების რაოდენობა შემაჯამებელი ოქმის გარდა არსად დაფიქსირებული არ იყო და ბიულეტენებიც უკვე დალუქული იყო, კომისიას არ უარყვია ბათილი ბიულეტენების რაოდენობის ხელოვნური ზრდა. ოლქთან სატელეფონო კონსულტაციების გავლის შემდეგ, უბანზე ხელმოწერების და ბიულეტენების ხელახლა გადათვლის გადაწყვეტილება მიიღეს.
ამომრჩეველთა ხელმოწერების ხელახლა გადათვლის პროცესში უბანზე ოლქის წარმომადგენლები მოვიდნენ. კომისია საბოლოოდ შეთანხმდა, რომ არჩევნებში მონაწილე ამომრჩეველთა საერთო რაოდენობა არასწორად იყო დათვლილი. ხმების დათვლის პროცესს აკვირდებოდა აჭარის ახალი მოწვევის უმაღლესი საბჭოს წევრი “ქართული ოცნებიდან” ნინო ჩხეტია. ამ უბნის შედეგებს “ახალგაზრდა იურისტთა ასოციაცია” და “სამართლიანი არჩევნები” დღეს სწავლობენ.
