ბათუმის მერიის ინფორმაციით, ბათუმი 2025 წელს კიდევ 18 ერთეულ ახალ ავტობუსს იყიდის, ამისთვის ბიუჯეტში 4 მილიონ 681 ათასი ლარი გაითვალისწინეს.
ბიუჯეტში ცვლილების პროექტის განმარტებითი ბარათის მიხედვით, დაგეგმილია 18 ერთეული ავტობუსის შეძენა, პროექტი 2025-2027 წლებში უნდა განხორციელდეს, რომლის ბიუჯეტიც საერთო ჯამში 11 მილიონ 702 456 ლარია.
ბათუმს, ავტოპარკის არაერთხელ განახლების მიუხედავად, საკმარისი მუნიციპალური ავტობუსები არ აქვს. ქალაქის სხვადასხვა ქუჩაზე მიმდინარე სამუშაოების გამო კი, არაერთი ავტობუსის მარშრუტია შეცვლილი.
არჩევნებამდე 2 თვე-ნახევრით ადრე ბათუმის მერია ასწრებს და ბიუჯეტში ცვლილება შეაქვს. საკრებულომ ბიუჯეტის სხვა შემოსავლების 10 მილიონით გაზრდას და ამ თანხის სხვადასხვა ღონისძიებებში გადანაწილებას მწვანე შუქი 31 ივლისს უნდა აუნთოს, ანუ ცვლილება დაამტკიცოს. მერია ამ ნამატი თანხიდან გეგმავს ასევე ახალი ავტობუსების შესყიდვის დაფინანსებას.
