Batumelebi | გიორგი კირთაძე „ნაციონალური მოძრაობის“ შეცდომებსა და გეგმებზე გიორგი კირთაძე „ნაციონალური მოძრაობის“ შეცდომებსა და გეგმებზე – Batumelebi
RU | GE  

გიორგი კირთაძე „ნაციონალური მოძრაობის“ შეცდომებსა და გეგმებზე

გიორგი კირთაძე არის ბოლო მოწვევის ბათუმის საკრებულოს წევრი, იყო წინა მოწვევის საკრებულოს თავმჯდომარე. ის არის „ნაციონალური მოძრაობის” კანდიდატი საქართველოს პარლამენტში. კენჭს იყრის #69 საარჩევნო ოლქში.

ბატონო გიორგი, თქვენს საარჩევნო პროგრამაში საუბარია ისეთ პროექტებზე, რომლებიც, წესით, დიდ ფინანსურ რესურსს მოითხოვს. რამდენით გაიზრდება ბიუჯეტი იმ შემთხვევაში, თუ ხელისუფლებაში მოხვალთ და როგორ აპირებთ ბიუჯეტის გაზრდას?

თუ ვსაუბრობთ პროგრამაზე, მე მგონი ყველაზე დიდი ბიუჯეტი სჭირდება სოციალური სახლების მშენებლობას. ჯამში 120 მილიონია ბიუჯეტი და გადანაწილებულია წლების მიხედვით – 2800 ბინა ოთხი წლის მანძილზე უნდა აშენდეს. ბუნებრივია, ეს ფინანსდება აჭარის ავტონომიური რესპუბლიკის ბიუჯეტიდან.

როგორც მახსოვს, ნაშთებიც აქვთ ძალიან ბევრი, მათ შორის არის აჭარის მთავრობის გაუწერელი ნაშთი, რომლიდანაც უსწრაფესად შეიძლება ამ პროგრამის დაწყება.

თქვენი პროგრამით ძალოვანი სტრუქტურების, საბაჟო, საგადასახადო ორგანოების, აჭარის პროკურორის, გარემოს დაცვის, სურსათის უვნებლობის სამსახურების ხელმძღვანელები უნდა დაინიშნონ აჭარის უმაღლეს საბჭოს სავალდებულო ჩართულობით. ეს კომპეტენციები „ნაციონალური მოძრაობის“ ხელისუფლებაში მოსვლამდე ჰქონდა რეგიონს და თქვენი ხელისუფლების პირობებში შეიზღუდა. რატომ მიიჩნევს ახლა პარტია საჭიროდ უფლებამოსილების გაზრდას?

არასწორია შედარება იმასთან, რასაც ასლანი [აბაშიძე] აკეთებდა, რადგან მას თავისი თავდაცვის მინისტრი და გენშტაბი ჰყავდა. შს მინისტრი ჰყავდა, რომელიც მხოლოდ მას ექვემდებარებოდა. ეგ იყო წმინდა წყლის სეპარატიზმი და არაფერი აქვს საერთო იმ ჩანაწერთან, რაც ჩვენ გვაქვს პროგრამაში. ლაპარაკია უფლებამოსილების იმ დონით ზრდაზე, რომელიც რეალურად გააუმჯობესებს ვითარებას, უფრო ეფექტურს გახდის მუშაობას. მაგალითად, მე როგორც მახსოვს, აუდიტის სამსახურის უფროსი ინიშნება აჭარის ავტონომიური რესპუბლიკის თანხმობით. თუ შეიძლება, რომ ამ სამსახურის ხელმძღვანელი დაინიშნოს ავტონომიური რესპუბლიკის უმაღლესი საბჭოს თანხმობით, რატომ არ შეიძლება იგივე გავრცელდეს, პირობითად, პროკურორთან მიმართებაში?

რას შეცვლის ეს?

მგონია, რომ ნდობის უფრო მაღალი ხარისხი იქნება.  უმაღლესი საბჭოს და, ზოგადად, ავტონომიის ხელისუფლების ჩართულობა ბევრად მეტი იქნება. რატომ ირჩევს პროკურორს თუ ამტკიცებს საქართველოს პარლამენტი? – ალბათ იმიტომ, რომ ბევრად მეტი ჩართულობა ჰქონდეს პარლამენტს, რაც მის საჯაროობას, ნორმალურ მუშაობას ხელს შეუწყობს. პროკურორს არ ნიშნავს არც ერთი კაცი, არც პრეზიდენტი, არც არავინ. ვფიქრობ, ეს სწორია. თუმცა, უმაღლესი საბჭოს თანხმობით უნდა დაინიშნონ თუ რამე სხვა ფორმით, ეს არის სამსჯელო თემა.

ეს ამომრჩევლისთვის იგივე განცხადება ხომ არ იქნება, რაც პაატა ბურჭულაძემ თქვა ადგილობრივი კადრების დანიშვნა-არდანიშვნასთან დაკავშირებით?

არა. პაატა ბურჭულაძეს ანტისახელმწიფოებრივი განცხადებაც ჰქონდა. ჩემი აზრით, ის ადგილობრივ კადრებს არ გულისხმობდა. ძალიან ვიწრო, სეპარატისტულ განცხადებაში გადაუვიდა, როცა თქვა, რატომ უნდა იყოს ჭეიშვილი [ირაკლი] და ერმაკოვი [გიორგი] ქალაქის მერი და საკრებულოს თავმჯდომარე. ისინი დაიბადნენ, გაიზარდნენ ბათუმში და, რა თქმა უნდა, კარგად იცნობენ ამ ქალაქს. ეს ის არ არის, რაზეც ჩვენ ვსაუბრობთ.

რატომ არ გააკეთეთ ეს მაშინ, როცა ხელისუფლებაში იყავით?

არ ვიცი გახსოვთ თუ არა, მაგრამ ამ საკითხს სულ აყენებდა ლევან ვარშალომიძე.

და მაშინ რატომ ვერ მოხერხდა?

ვერ მოხერხდა სამწუხაროდ. კიდევ ერთხელ ვამბობ – მაშინაც ვფიქრობდით ჩვენი გუნდი, რომ აჭარის ავტონომიური რესპუბლიკის ხელისუფლების უფლებამოსილება უნდა ყოფილიყო უფრო მეტი, რაღაც საკითხებში უნდა შემცირებულიყო ცენტრალური ხელისუფლების ჩართულობა.

საარჩევნო პროგრამაში გიწერიათ, რომ ეკონომიკური დანაშაული უნდა იყოს დეკრიმინალიზებული, ხოლო წინასწარი პატიმრობა ეკონომიკური დანაშაულის შემთხვევაში საერთოდ უნდა გაუქმდეს. ასევე წერია ფინანსური პოლიციის გაუქმებაზე. წინასწარი პატიმრობა ეკონომიკური დანაშაულის შემთხვევაში სწორედ თქვენი ხელისუფლების დროს  დაინერგა ფართოდ. ეს ჩანაწერი ნიშნავს იმას, რომ რაღაც ტიპის შეცდომებს აღიარებთ?

აბსოლუტურად სწორი დასკვნაა, რაღაც ტიპის შეცდომები იქნა დაშვებული, რაც გააზრებული გვაქვს. ის, რომ უნდა მოხდეს ფინანსური ამნისტია, ის, რომ ამ ტიპის დარღვევებზე არ არის აუცილებელი ადამიანები ისხდნენ ციხეში, შესაძლებელია. რა თქმა უნდა, ეს არის „ნაციონალური მოძრაობის“ შეცდომებზე გააზრებული პასუხი.

ფინანსური პოლიციის გაუქმება  ნიშნავს იმას, რომ კონტროლი აღარ უნდა განხორციელდეს?

ნამდვილად არ ნიშნავს ამას. ჩვენ ვცხოვრობდით სახელმწიფოში, სადაც გადასახადს არავინ იხდიდა, არც საბაჟოზე იკრიბებოდა თანხა და არც არსად, ვგულისხმობ 2004 წლის საქართველოს. რაღაც პერიოდის განმავლობაში  სასიცოცხლოდ აუცილებელი იყო ბიუჯეტში შესულიყო თანხა, სახელმწიფოს თავისი დანიშნულება რომ შეესრულებინა. რაღაც ეტაპზე ეს შეიძლება იყო საჭირო, თუმცა რაღაც ეტაპზე, როცა საზოგადოება შეთანხმებულია იმაზე, რომ გადასახადი უნდა გადაიხადოს, ფინანსური პოლიცია, როგორც სადამსჯელო ინსტრუმენტი იმ ფორმით, რა ფორმითაც დღეს არის, აღარ უნდა არსებობდეს. ამის საჭიროება იდგა 2004 წელს, ამის საჭიროება დღეს აღარ დგას.

ქობულეთში აეროპორტის მშენებლობაზე მინდა გკითხოთ, რა გათვლები არსებობს ამ პროექტთან დაკავშირებით?

თუ ჩვენ ვაშენებთ ქალაქს, რომელშიც უფრო მეტი ადამიანი უნდა ჩამოვიდეს, ვიდრე ბათუმის აეროპორტს ამის მიღების საშუალება აქვს, აეროპორტის აშენება არის ძალიან მნიშვნელოვანი. ეს პროექტი პირდაპირ კავშირში არ არის ინდუსტრიულ ზონასთან, მაგრამ  ჩვენ წარმოგვიდგენია, რომ აჭარას, კონკრეტულად ბათუმს, აქვს პოტენციალი მოიზიდოს მრავალი ინვესტორი იმისთვის, რომ ინდუსტრიული ზონები გაჩნდეს. სახელმწიფოს ხელშეწყობა ამ საქმეს სჭირდება – ვგულისხმობ კომუნიკაციების მიყვანას, რეგულაციების დაწესებას და ასე შემდეგ. ის, რომ რეგიონი და ქალაქი ამისთვის მზად არის, ამაში ვარ დარწმუნებული. მაგალითად, როცა „შერატონი“ შენდებოდა, უამრავი კვლევა ტარდებოდა, მაგრამ, როგორც კი ის აშენდა, სხვა ბრენდებიც მარტივად შემოვიდა ქალაქში. ამიტომ მგონია, რომ ჩვენი ქალაქი არის მზად, ბევრი ინვესტორის მოსაზიდად.

გადასახადებს ამცირეთ 10 პროცენტამდე. ამ მიმართულებით დიდი კონკურენციაა პარტიებს შორის გაჩაღებული. ეს რამდენად რეალისტური გეგმაა?

გადასახადების შემცირების პოლიტიკით არ ვგავართ სხვა პარტიებს. ზოგიერთი პარტია პირდაპირ ამცირებს გადასახადებს, ზოგიერთი საერთოდ გაუქმებას ითხოვს. ჩვენ გვგონია, რომ სახელმწიფო ბიუჯეტიდან მილიარდამდე ლარია დახარჯული სხვადასხვა სახელმწიფო ორგანიზაციებში ფუფუნების ხარჯებზე, მივლინებაზე… ჩვენ მიგვაჩნია, რომ თანხის გამოთავისუფლება და ბიზნესისთვის დატოვება რეალურია.

გადასახადების  შემცირებაზე როცა ვლაპარაკობთ, რა თქმა უნდა, პირველ ეტაპზე შემოსავლები აკლდება ბიუჯეტს, მაგრამ არა იმის ხარჯზე, რომ გზა არ გაკეთდება, სოციალური პროგრამები გაჩერდება… თავდაცვასა და შს სამინისტროსთვის ხარჯების მოკლების გარეშე შეიძლება მეტი ფულის დატოვება ბიზნესისთვის, რომელიც განვითარდება და მეტ სამუშაო ადგილს შექმნის.

ხომ არ გაუარესდება იმ ადამიანების პირობები, რომლებიც საჯარო სამსახურებში მუშაობენ?

მე არ ვგულისხმობ, რომ ხელფასები უნდა შევამციროთ, პირიქით, შესაძლებელია, ხელფასები გაიზარდოს. აქ საუბარია უაზრო დანამატებსა და პრემიებზე, რომელიც რაღაც უწყებებში გაიცემა. იმ ადამიანებს, რომლებიც საქმეს აკეთებენ დღეს და, ჩემი აზრით, იმაზე დაბალ ანაზღაურებას იღებენ, ვიდრე მათ ეკუთვნით, რა თქმა უნდა, ეს მათ არ შეეხება – პირიქით, მათი ხელფასი შესაძლებელია კიდევ გაიზარდოს. საუბარია იმ ტიპის ხარჯებზე, რომლის ამოღებაც არ დაარტყამს სახელმწიფოს ყველა მნიშვნელოვან ფუნქციას, რასაც ის უნდა ასრულებდეს. ეს არის წარმომადგენლობის ხარჯები, ფუფუნების ხარჯები…

პროგრამაში გიწერიათ აჭარის ზღვისპირა ზოლის ნაპირგამაგრებაზეც. ეს არის დიდი გამოწვევა ყველა ხელისუფლებისთვის, მოსახლეობისთვის. როგორ აპირებთ ამ პრობლემის მოგვარებას?

ალბათ საჭირო იქნება იმ პროექტის ხელახალი გადათვლა, რომელიც მზად იყო და თუ არ ვცდები 55 მილიონი ლარი სჭირდებოდა. ეს პროექტი მოწონებული იყო საქართველოს მთავრობის მიერ, გარემოს დაცვის სამინისტროსთან იყო შეთანხმებული, მუნიციპალური განვითარების ფონდი ღებულობდა სესხს აზიის განვითარების ბანკიდან და ტარდებოდა ნაპირსამაგრი სამუშაოები. ეგრეთ წოდებული ოქროს ქვიშების პროექტი იყო ნაპირგამაგრებითი სამუშაოს ერთ-ერთი კომპონენტი. საუბარი იყო პიშევიკებიდან „სანრემოს“ ხიდამდე შესაბამისი ქვიშის დაყრაზე, რომელიც ჩვენს ქალაქში ტურიზმის პოტენციალს გაზრდიდა. ჩვენ ხელისუფლებას ვთავაზობდით ამ პროექტს, გონიოს ხიდის მშენებლობის პროექტს, მაგრამ ორივეზე საზეიმოდ ითქვა უარი. მესამე იყო სტადიონი.

თუმცა, მაშინ თქვა ხელისუფლებამ, რომ ამ პროექტების განსახორციელებლად სათანადო კვლევები არ იყო ჩატარებული.

სიტყვების მიღმა მე დოკუმენტი არ მინახია. გვეუბნებოდნენ, რომ იქ ჩიტების გადაფრენას თუ ნავიგაციას უშლიდა ხელს. ვერც ერთი არგუმენტი ვერ იქნა წარმოდგენილი, რატომ არ აშენდა სტადიონი იქ, სადაც ბათუმის მერიას ბიუჯეტიდან უკვე გადახდილი ჰქონდა თანხა… ეს პროექტები მომავალი წლისთვის არის დაწყებადი და ასევე სწრაფად დასრულებადი.

2012 წელს მოქმედი ხელისუფლება ამბობდა პენსიების გაზრდაზე. მერე თქვეს, რომ პენსიები გაიზრდებოდა შემდეგი ოთხი წლის განმავლობაში. თქვენ პროგრამაშიც გიწერიათ, რომ პენსია გაიზრდება 50 ლარით. ეს რას ნიშნავს?

გაიზრდება ნოემბრიდან.

და დარჩება შემდეგი ოთხი წელი?

გაიზრდება ყოველწლიურად.

ადგილობრივი მეთევზეებისთვის გამარტივებული წესით ლიცენზიის მოპოვებაზე გიწერიათ. თუმცა ეს უფლებაც თავის დროზე სწორედ თქვენი ხელისუფლების მიერ იყო გაუქმებული. ასე ხაზგასმით რატომ შეიტანეთ მეთევზეების საკითხი პროგრამაში?

ეს არის აქტუალური საკითხი და ძალიან აწუხებს ჩვენს თანამოქალაქეებს. ადგილობრივი მეთევზეებისთვის შესაბამისი ინფრასტრუქტურის მოწყობაც იგეგმება ნაპირგამაგრებითი პროექტის ფარგლებში. მეთევზეებისთვის სპეციალური ღონისძიების გატარება იგეგმება, მათ შორის ლიცენზიის მოპოვებაც გამარტივდება.

თქვენ გიწერიათ, რომ სასკოლო ვაუჩერის ღირებულება გაიზრდება 50 პროცენტით, ხოლო მასწავლებლის ხელფასი იქნება მინიმუმ 650 ლარი. თუმცა, უკვე ცნობილია, რომ მასწავლებლის საშუალო ხელფასი ახალი წლიდან იქნება 800 ლარი.

ასევე გვახსოვს, ჩვენ 230-ლარიანი პენსიები, ახლა გამოვიდნენ და გვითხრეს, რომ 70 თეთრად ჩაიბარებენ მანდარინს. რასაც „ქართული ოცნება“ ამბობს, არ გვაქვს სწორება ამისკენ. ამ შემთხვევაში საუბარია მინიმალურ ხელფასზე, მაგრამ, რა თქმა უნდა, იქნებიან პედაგოგები, რომლებსაც უფრო მეტი ექნებათ.

ეგრეთ წოდებული ტექნოლოგიური უნივერსიტეტის შენობის ფოტო გაქვთ საარჩევნო ბუკლეტში გამოყენებული. ეს შენობა თავის დროზე აშენდა კანონის სრული უგულებელყოფით და ძეგლის, ანუ ბათუმის ბულვარის ხელყოფით. როცა ამ შენობას ბეჭდავთ საარჩევნო ბუკლეტში, ეს ხომ არ უნდა გავიგოთ ისე, როგორც მესიჯი, რომ იმავე პოლიტიკას გაატარებთ ხელისუფლებაში მოსვლის შემთხვევაში?

მესმის თქვენი დამოკიდებულება ამ შენობისადმი, ისე როგორც ბევრი ბათუმელის. თუკი რამე გვქონდა ჩვენ აჭარაში მართვის პროცესში, მთავარი შეცდომა იყო ის, რომ საქმეები კეთდებოდა უფრო სწრაფად, ვიდრე მოქალაქეთა ჩართულობა მიყვებოდა მას. ერთ-ერთი ყველაზე ნათელი მაგალითი იყო ეს შენობა, რომელიც, ჩემი აზრით, უნდა ყოფილიყო ჩვენი თანაქალაქელებისთვის ყველაზე საყვარელი შენობა თავისი მნიშვნელობით, მაგრამ, სამწუხაროდ, ასე ვერ ვაქციეთ.

აღარ ვიდავოთ იმაზე, იყო ძეგლი თუ არ იყო, ბულვარს ეხებოდა ეგ ტერიტორია თუ არ ეხებოდა, რა იდგა ადრე ამ ადგილას, როგორი ტიპის განაშენება უნდა ყოფილიყო და ასე შემდეგ. ამ ტიპის გადაწყვეტილებები იყო ჩვენი შეცდომა, რასაც ვაღიარებ და რის გამოსწორებასაც ვისურვებდი ხელისუფლებაში მოსვლის შემთხვევაში. თუ გვინდა, რომ ბათუმში ავაშენოთ ტექნოლოგიური უნივერსიტეტი ან სხვა კარგი საქმე გავაკეთოთ, ჯერ უნდა ვკითხოთ ხალხს და მათთან ერთად დავიწყოთ ამ ყველაფრის კეთება და არა ისე, რომ ჯერ გავაკეთოთ და მერე ავუხსნათ, რატომ არის ეს შენობა ძალიან მნიშვნელოვანი.

მაგ შენობაში უნდა განთავსებულიყო ბათუმის ტექნოლოგიური უნივერსიტეტი, რომლის როლი ჩვენი ქალაქის სამომავლო ცხოვრებაში იქნებოდა ძალიან დიდი. საერთოდ, ბათუმის საუნივერსიტეტო ქალაქად გადაქცევა არამხოლოდ საქართველოს მასშტაბით, არამედ ჩვენს რეგიონში, ძალიან მნიშვნელოვანია.

კიდევ ერთხელ ვიმეორებ, ცუდი რაც გვქონდა თავის დროზე, ყველაზე ნათელ მაგალითს მივაგენით – ეს შენობა ჩემთვის ტექნოლოგიური უნივერსიტეტია, თქვენთვის და ბევრისთვის ობიექტური გაბრაზების მიზეზი მთავრობაზე. ვისურვები, რომ ასე აღარ მოხდეს. თუმცა თქვენგან განსხვავები, ის ადამიანები, ვინც ამ შენობას აპროტესტებდა, მერე აღარ აპროტესტებდნენ იქვე ერთი იმხელა შენობის მიდგმას… სამწუხაროდ, გულწრფელი პროტესტი ალბათ რამდენიმე ადამიანს ჰქონდა მაშინ ქალაქში.

თქვენი ხელისუფლება, რამდენიმე ადამიანის გამოკლებით, რიგი მედიისთვის იყო ხაზგასმით ხელმიუწვდომელი. მაგალითად, არასოდეს გვეძლეოდა აჭარის მთავრობის სხდომების გაშუქების შესაძლებლობა, იყო ჟურნალისტების იძულებითი გამოძევების ფაქტები, ვთქვათ, აჭარის მთავრობის ადმინისტრაციული შენობიდან. მაშინ, როცა დღეს ეს ძალიან მარტივია. ჩვენ ახლაც ვცადეთ თქვენი პარტიის ლიდერის, ლევან ვარშალომიძის ჩაწერა, მაგრამ ეს ისევ შეუძლებელი აღმოჩნდა. თუ ვარშალომიძე გახდება აჭარის მთავრობის თავმჯდომარე, უნდა ველოდოთ, რომ მედიისთვის ისევ დაიხურება მთავრობის ადმინისტრაციული შენობების კარები?

დავიწყებ იმით, რომ ვერ დაგეთანხმებით ბოლომდე შეფასებებში. მე მგონია, რომ არ იყო ასე რთულად საქმე, თუმცა რაღაც სირთულეები იყო. ძალიან რთულია ილაპარაკო სხვის ნაცვლად, რატომ არ ურთიერთობს ჟურნალისტებთან ლევან ვარშალომიძე. მე მგონია,  რომ ის ჟურნალისტებთან ურთიერთობს. შესაბამისად, არ ვიცი, რატომ ვერ მოახერხეთ მასთან ინტერვიუს ჩაწერა. ცუდია, თუ ვერ მოახერხეთ და მზად ვარ გიშუამდგომლოთ. თუმცა, ვფიქრობ, რომ არ უნდა გჭირდებოდეთ ჩემი შუამდგომლობა, გეთანხმებით ამაში.

ლევან ვარშალომიძე, თუ არ ვცდები, დღეს ხულოშია, საღამოს ქობულეთში, ზეგ ხელვაჩაურშია, აქტიურ საარჩევნო რეჟიმშია. თუმცა, ალბათ, ამ მიმართულებითაც არსებობდა პრობლემები.

როცა მე ჩართულობაზე ვლაპარაკობდი, სამწუხადოდ, როგორც ჩანს, მედიასთანაც იგივე პრობლემები იყო, არამასშტაბური, მაგრამ ალბათ იყო. ვიმედოვნებ, მედიასთან მჭიდრო ურთიერთობას იქონიებენ საჯარო მოხელეები, მთავრობის თავმჯდომარით დაწყებული, დამთავრებული ნებისმიერი მოხელით. თუ არ იქნება ასე, მაშინ ვიქნებით იგივე პრობლემის წინაშე, რა პრობლემის წინაშეც დავდექით – ბევრ კარგ საქმეს ვაკეთებდით, მაგრამ მერე ვერ ვხსნიდით ამ კარგ საქმეებს.

რას ელოდებით არჩევნებისგან?

დარწმუნებული ვარ, რომ ამ არჩევნებში ჩვენ გავიმარჯვებთ და ამას ვლაპარაკობ იმ განწყობიდან, რაც მომყვება მაგალითად, ქუთაისის ქუჩიდან, ჭაობიდან, გორგილაძიდან… ყველა ჩემს მეგობარს, რომელსაც ხანდახან ეჭვი ეპარება „ნაციონალური მოძრაობის“ გამარჯვებაში, ვეუბნები მისთვის სასურველ ფორმაში, მისთვის სასურველ ქუჩაზე ჩავატაროთ კარდაკარი… ხალხი ძალიან კარგად გვხვდება. მიუხედავად იმისა, რომ ბოლო ოთხი წელი „ქართული ოცნებას“ მეტი არაფერი უკეთებია, რომ სიძულვილის დათესვას ცდილობდა საზოგადოებაში, ფაქტია, რომ აქაც კრახი განიცადეს. მათი ტყუილების კასკადი არ მუშაობს. ვფიქრობ,  არ გვყავს ცუდი კანდიდატები არც მაჟორიტარებში, არც სიაში, მთავრობის თავმჯდომარეობის კანდიდატი კი გვყავს მაღალრეიტინუგული.

აჭარის მთავრობა კვლავაც არ ცვლის პოლიტიკას და არ აკეთებს კომენტარს გასულ კვირას სასამართლოს მიერ მიღებულ გადაწყვეტილებაზე, რაც ქობულეთში მუსლიმურ პანსიონთა მიმართებაში დისკრიმინაციის აღმოფხვრას გულისხმობს. უნდა მიიღოს თუ არა ხელისუფლებამ მონაწილეობა ამ საკითხის გადაჭრაში და თუ კი, როგორი შეიძლება იყოს მისი როლი?

ზოგადად გეტყვით: ჩვენ ქალაქს ყველაზე კარგად ეტყობა, რომ ეს არის  ხელოვნურად შექმნილი პრობლემები. აქ ერთ კვარტალშია განთავსებულია სხვადასხვა სამლოცველო და სხვადასხვა აღმსარებლობის ადამიანები ძალიან კარგად თანაცხოვრობენ. 2012 წლის არჩევნებისთვის, „ქართული ოცნება“ იყო ის პოლიტიკური პარტია, რომელმაც გაბედა და ამ თემაზე სპეკულირება დაიწყო. ამის გაგრძელება იყო ის ყველაფერი, რაც მოხდა ქობულეთში, ჭელაში, ჯუმათშიც და სხვაგან. ამ ყველაფერს ემატება „ქართული ოცნების“ მნიშვნელოვანი დანამატის – თარხან მოურავის იმ ტიპის განცხადებები, რასაც ეგენ აკეთებენ და სწორედ ამის გამო ვიღებთ იმ შედეგებს, რასაც ვიღებთ.

კონკრეტულ გადაწყვეტილებაზე დეტალურად ვერ ვისაუბრებ, რადგან გადაწყვეტილებას არ ვიცნობ, მაგრამ ერთი რამე შემიძლია ვთქვა, პოლიტიკა საერთოდ უნდა დავაშოროთ ამ თემებს და ყველაფერი იქნება კარგად.

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან