ბათუმის პროევროპული აქციების მედროშე თემურ ქათამაძე [გაფფარ ილმაზი], მისი შიმშილობის 30-ე დღეს, იზოლატორიდან კლინიკაში გადაიყვანეს.
ინფორმაციას ამის შესახებ “ბათუმელებს” თემურ ქათამაძის მეგობარი უდასტურებს.
„დილას ვნახე, ფიზიკურად ძალიან დასუსტებული იყო. ცუდად გამოიყურებოდა, წვერიც არ ჰქონდა გაპარსული, მაგრამ სულიერად მხნედ იყო. საბუთებს აგროვებს თავის საქმეზე. ახლა ადვოკატს ვესაუბრე და მითხრა, რომ კლინიკა „ჰელსიკორში“ გადაიყვანეს ,“ – უთხრა „ბათუმელებს“ თემურ ქათამაძის მეგობარმა ნინო კაკულიამ.
საქართველოს ახალგაზრდა იურისტთა ასოციაციის ადვოკატი მარიამ გაბროშვილი, რომელიც თემურ ქათამაძის ინტერესებს იცავს, „ბათუმელებთან“ საუბარში ამბობს, რომ მისი დაცვის ქვეშ მყოფი კლინიკაში აუცილებელი გამოკვლევებისთვის გადაიყვანეს.
„ბოლოს გუშინ, 14 თებერვალს მოვინახულე ბატონი თემური. შიმშილობის ამ ვადაზე ბუნებრივია აღენიშნება წონის მნიშვნელოვანი კლება, რასაც თან ახლავს სისუსტეც. თუმცა თავს მაინც კარგად გრძნობს. გუშინვე მაცნობა, რომ დღეს გეგმავდა დასთანხმებოდა კლინიკაში გადასვლას გამოკვლევების ჩატარების მიზნით,“ – უთხრა „ბათუმელებს“ მარიამ გაბროშვილმა.
თემურ ქათამაძე თბილისში, შსს-ს მიგრაციის დეპარტამენტის დროებითი განთავსების ცენტრში, შიმშილობდა.
მან შიმშილობა 16 იანვარს დაიწყო, მას შემდეგ რაც ის მეორედ დააკავეს.
„17 კილოგრამი აქვს დაკლებული“ – რას ამბობს ადვოკატი თემურ ქათამაძის ჯანმრთელობაზე
