ფიქრია ეპიტაშვილი, რომელსაც გუშინ, 11 დეკემბერს, სკოლასთან ახლოს თავს დაესხა უცნობი პირი, პოლიციამ გამოჰკითხა.
„სამსახურში მივდიოდი, როცა უცნობი პირი უკანა მხრიდან მომიახლოვდა და სახეზე დაზიანება მომაყენა. მეუბნებოდა, „გაა**ი შენს საყვარელ ევროპაში, შენნაირ აგენტებთან და პიდარასტებთან“. ვცდილობდი ის საგანი წამერთვა, რითაც ჭრილობა მომაყენა. ამ დროს კი დამიზიანდა ხელი რამდენიმე ადგილას“, – ამბობს ფიქრია „ბათუმელებთან“.
როგორც ფიქრია გვიყვება, თავდამსხმელი 40 წლამდე კაცია. აქამდე არასდროს უნახავს და არც არავისთან ჰქონია კონფლიქტი.
„თავდასხმის დროს სახე ნახევრად დაფარული ჰქონდა, არ ვიცნობ ამ კაცს“, – გვეუბნება ფიქრია.
ფიქრია ეპიტაშვილი იმ საპროტესტო აქციებში მონაწილეობს, რომელიც 28 ნოემბრის შემდეგ მთელ ქვეყანაში მასობრივად იმართება.
აქციის მონაწილეები აპროტესტებენ „ქართული ოცნების“ განცხადებას იმის თაობაზე, რომ მათ 2028 წლამდე შეაჩერეს ევროკავშირთან მოლაპარაკება გაწევრიანების თაობაზე.
როგორ ფიქრობთ, ხომ არ არის თავდამსხმელი წახალისებული ვინმესგან, რადგან ამ დღეებში ჩვენ ვხედავთ, როგორ უსწორდებიან ნიღბიანი პირები საპროტესტო აქციის მონაწილეებს? – ვკითხეთ ფიქრია ეპიტაშვილს. ფიქრიას აზრით, ამას დრო გვიჩვენებს.
„ვერ გეტყვით, არ ვიცი. ჯერ კიდევ არის საგამოძიებო მოქმედებები ჩასატარებელი და ვნახოთ, დაველოდოთ მოვლენებს“, – ამბობს ფიქრია.
მას კიდევ ვკითხეთ, რამდენად ენდობა გამოძიებას, რადგან ამ დღეებში ვნახეთ, რომ პოლიცია ფაქტობრივად უმოქმედოა და მათ თვალწინ უსწორდებიან ნიღბიანი დაჯგუფებები მოქალაქეებს.
„დაველოდოთ გამოძიებას და შემდეგ მექნება ამაზე ჩემი მოსაზრება“, – გვითხრა ფიქრიამ.
ფიქრია ეპიტაშვილი კაზრეთის ერთ-ერთ საჯარო სკოლაში საინფორმაციო მენეჯერად მუშაობს.
