„1 ცალი ბურგერი ყველით და ლორით [დიდი] – 4,00 ლარი, 1 ცალი იმერული ხაჭაპური – 3,00 ლარი, 1 ცალი ღვეზელი კარტოფილით ნახევრად ფენოვანი ცომით – 1,20 ლარი, 1 ცალი ჰოთ დოგი – 2,80 ლარი, 1 ცალი ლობიანი – 1,80 ლარი, 1 ცალი შოკოლადი „სნიკერსი“ 0.80 გრ – 2,36 ლარი, 2 ბოთლი წყალი „მთის” 0.5 ლ პეტი – 1,26 ლარი, [ცალის ღირებულება 0,63 თეთრი], 1 ცალი გაზიანი გამაგრილებელი სასმელი „კოკა-კოლა” 0.5 მლ – 1.50 ლარი,“ – ეს იმ საკვების ჩამონათვალია, რასაც ბათუმის საპროტესტო აქციაზე მყოფ შინაგან საქმეთა სამინისტროს თანამშრომლებს ყოველდღიურად აჭმევენ.
ერთი ნაკრების ჯამური ღირებულება 17,92 ლარია. მხოლოდ 5 დღეში – 4 დეკემბრიდან 8 დეკემბრის ჩათვლით – ბიუჯეტიდან აქციაზე მყოფი 500 სამართალდამცველის კვებისთვის 44 800 ლარი დაიხარჯა.
გადაუდებელი აუცილებლობის შესყიდვის საჭიროებას შსს აჭარის პოლიციის დეპარტამენტის დირექტორის მოადგილე, დავით ათაბეგაშვილი ასაბუთებს. მას მოუმზადებია პატაკი კვების საკითხზე:
„როგორც თქვენთვის ცნობილია საქართველოს მასშტაბით, მათ შორის ბათუმში გრძელდება აქციები, სადაც აქციის მონაწილეთა საზოგადოებრივი უსაფრთხოებისა და მართლწესრიგის დაცვის უზრუნველყოფს მიზნით მობილიზებულია შსს აჭარის ა/რ პოლიციის დეპარტამენტის მოსამსახურეები, რასთან დაკავშირებითაც, საზოგადოებრივი უსაფრთხოებისა და მართლწესრიგის დაცვის ღონისძიებებში მონაწილე შსს აჭარის ა/რ პოლიციის დეპარტამენტის მოსამსახურეთათვის გვესაჭიროება კვებით უზრუნველყოფის მომსახურების შესყიდვა.
გთხოვთ, დაავალოთ შესაბამის სამსახურს, 2024 წლის 04 დეკემბრიდან 2024 წლის 08 დეკემბრის ჩათვლით, 5 [ხუთი] კალენდარული დღის განმავლობაში, ყოველდღიურად, განახორციელოს შსს აჭარის ა/რ პოლიციის დეპარტამენტის 500 [ხუთასი] ერთეული თანამშრომელთათვის კვებით [საკვებით, წყლით, შოკოლადით და გაზიანი გამაგრილებელი სასმელი] უზრუნველყოფის მომსახურების შესყიდვა,“ – ვკითხულობთ პატაკში.
შინაგან საქმეთა სამინისტრო შესყიდვის დოკუმენტაციაში გადაუდებელი აუცილებლობით შესყიდვას ამგვარად ასაბუთებს:
„გადაუდებელი აუცილებლობის ვითარების დადგომა გამოიწვია იმ ფაქტმა, რომ საქართველოს მასშტაბით, მათ შორის ბათუმში გრძელდება აქციები, რასთან დაკავშირებითაც აჭარის ა.რ. პოლიციის დეპარტამენტის სამოქმედო ტერიტორიაზე აქციის მონაწილეთა საზოგადოებრივი უსაფრთხოებისა და მართლწესრიგის დაცვის უზრუნველყოფს მიზნით, კვლავ მობილიზებულია საქართველოს შსს აჭარის ა/რ პოლიციის დეპარტამენტის თანამშრომლები.
საქართველოს მასშტაბით, მათ შორის ბათუმში გრძელდება აქციები, რამაც განაპირობა, შსს აჭარის ა/რ პოლიციის დეპარტამენტის სამოქმედო ტერიტორიაზე, აქციის მონაწილეთა საზოგადოებრივი უსაფრთხოებისა და მართლწესრიგის დაცვის მიზნით მობილიზებული, ამავე დეპარტამენტის თანამშრომელთა პროცესში ჩართვა.
თუ კი ვერ მოხდებოდა, ქალაქ ბათუმში მიმდინარე აქციების გამო, შსს აჭარის ა/რ პოლიციის დეპარტამენტის სამოქმედო ტერიტორიაზე, აქციის მონაწილეთა საზოგადოებრივი უსაფრთხოებისა და მართლწესრიგის დაცვის მიზნით მობილიზებულ, ამავე დეპარტამენტის თანამშრომელთა საკვებით [საკვებით, წყლით, შოკოლადით და გაზიანი გამაგრილებელი სასმელი] უზრუნველყოფა, ვითარება მნიშვნელოვან ზიანს მიაყენებდა, როგორც სახელმწიფო, ასევე საზოგადოებრივ ინტერესებს,“ – აღნიშნულია შესყიდვის დოკუმენტაციაში.
—-
2024 წლის გაზაფხულზე, ანტირუსული აქციების დროს, შინაგან საქმეთა სამინისტრომ თბილისში, პარლამენტის შენობის მიმდებარედ მობილიზებული პოლიციელებისა და სპეცრაზმელების ლანჩისთვის [2024 წლის აპრილ-მაისში] ჯამში 753 744 ლარი დახარჯა. აქედან ტენდერით მხოლოდ 150 ათასი ლარი, დანარჩენი კი, უტენდეროდ – გამარტივებული წესით.
ვრცლად: შსს-მ სპეცრაზმის ლანჩისთვის 88,5 ათასი ლარი დახარჯა 28 მაისის აქციის დროს
საქართველოში მასშტაბური პროტესტი, რომელმაც არა მარტო თბილისი, არამედ მთელი საქართველო მოიცვა, მას შემდეგ გამწვავდა, რაც 2024 წლის 28 ნოემბერს ირაკლი კობახიძემ „ქართული ოცნების“ გადაწყვეტილების შესახებ განაცხადა, რომ პროცესი ევროკავშირში გაწევრიანების შესახებ „ქართული ოცნების“ ხელისუფლების მიერ 2028 წლის ბოლომდე ჩერდება.
28 ნოემბრიდან დღემდე ათასობით ადამიანი გამოდის საპროტესტო აქციებზე თბილისში, ბათუმსა და საქართველოს სხვა ქალაქებში. დაკავებულია და სასტიკად ნაცემი 400-ზე მეტი ადამიანი, მათ შორის 70-ზე მეტი ჟურნალისტი, სახელოვნებო სივრცის წარმომადგენლები. არაიდენტიფიცირებადი პირები ჯგუფურად თავს ესხმიან ქუჩებში მოქალაქეებსა და მედიას.
__
ამ თემაზე:
