დღეს, 1 აგვისტოს, უმაღლეს საარჩევნო კომისიაში წარმოდგენილ იქნა ახალგაზრდა იურისტთა ასოციაციის განცხადება, რომელიც უცხო ქვეყნის მოქალაქის წინასაარჩევნო აგიტაციაში სავარაუდო მონაწილეობას ეხება.
საქმე ეხება საქართველოს ყოფილი პრეზიდენტის, მიხეილ სააკაშვილის ვიდეომიმართვას, რომელიც გუშინ, 31 ივლისს, „ნაციონალური მოძრაობის“ მიერ მაჟორიტარი დეპუტატობის კანდიდატების პრეზენტაციაზე განხორციელდა. მიხეილ სააკაშვილი უკრაინის მოქალაქეა.
უმაღლესი საარჩევნო კომისიის თავმჯდომარის პარმენ ჯალაღონიას განმარტებით, უსკო კანონით დადგენილი ფორმით განიხილავს შესაბამის საჩივარს და დაიწყებს ადმინისტრაციულ წარმოებას. „კანონის თანახმად, მიღებული იქნება შესაბამისი გადაწყვეტილება“.
როგორც პარმენ ჯალაღონია განმარტავს, საარჩევნო კოდექსის შესაბამისად, თუკი დადასტურდება უცხო ქვეყნის მოქალაქის მონაწილეობა წინასაარჩევნო აგიტაციაში, პირი 2000 ლარით დაჯარიმდება.
რაც შეეხება უსკოს მიერ ადმინისტრაციულ წარმოებას, როგორც პარმენ ჯალაღონია აცხადებს, მიმდინარე კვირის ბოლომდე დასრულდება.
უმაღლესი საარჩევნო კომისიის თავმჯდომარემ კითხვაზე, თუ ვინ უნდა დაჯარიმდეს ამ შემთხვევაში – პირი თუ პარტია? პასუხისგან თავი შეიკავა, რადგან მისი თქმით, ეს საკითხი ბევრ ნიუანსს ითვალისწინებს.
„ჯერ უნდა გაირკვეს, ვიდეომიმართვის გავრცელება ჩაეთვლება თუ არა პირს ან პარტიას წინასააჩევნო აგიტაციაში. ამასთანავე, არის თუ არა ამ შემთხვევაში უცხო ქვეყნის მოქალაქე სამართალდარღვევის სუბიექტი.
გარდა ამისა, ჩვენ გვექნება ურთიერთობა და კონსულტაციები ცენტრალურ საარჩევნო კომისიასთან. მნიშვნელოვანია ისიც, აქვს თუ არა უმაღლეს საარჩევნო კომისიას მოქმედი კანონმდებლობით შესაბამისი საჩივრის (განცხადების) განხილვის უფლება. შესაძლებელია საჩივარი გადაეცეს ცენტრალურ საარჩევნო კომისიას“ – აცხადებს პარმენ ჯალაღონია.
პარმენ ჯალაღონიამ ჟურნალისტებთან შეხვედრაზე აღნიშნა, რომ შესაბამის გადაწყვეტილებას ამ საკითხების შეფასების შემდეგ გააჟღერებს.
