25 აპრილიდან ვენეციის დასათვალიერებლად გარკვეულ დღეებში თანხის გადახდა მოგიწევთ. ქალაქში შესასვლელად ყველა ტურისტი დღეში [8:30-დან 16:00 საათამდე] 5 ევროს გადაიხდის, ცალკეულ დღეებში კი – 10 ევროს.
იტალიური მედიის ცნობით, ეს არის ექსპერიმენტული პროექტი, რომელიც მუნიციპალური საკრებულოს თქმით, ემსახურება ტურისტული ნაკადების უკეთ მართვას.
გადასახადი იმოქმედებს შემდეგ თარიღებში – 25, 26, 27, 28, 29 და 30 აპრილი. 1, 2, 3, 4, 5, 11, 12, 18, 19, 25, 26 მაისი, 8, 9, 15, 16, 22, 23,29, 30 ივნისი და 6, 7, 13,14 ივლისი.
მედიის ცნობით, მთავარი საკონტროლო პუნქტი იქნება რკინიგზის სადგურ ვენეცია „სანტა ლუჩიაში“, ასევე ყველა იმ პატარა სადგურში, საიდანაც ვენეციაში მოხვედრაა შესაძლებელი.
ვენეციის მუნიციპალიტეტში მცხოვრებთათვის და ვენეციაში დაბადებულთათვის გადასახადი არ იმოქმედებს. ხოლო იმ ვიზიტორებს, რომლებიც გადასახადს არ გადაიხდიან, 50-დან 300 ევრომდე ჯარიმა ემუქრებათ.
ვენეცია ასე ცდილობს შეამციროს ტურისტების შემოდინება ქალაქში, რომელიც იუნესკოს მსოფლიო მემკვიდრეობის ძეგლია. ქალაქში ყოველწლიურად დაახლოებით 30 მილიონი ტურისტი ჩადის.
______________
ფოტო: Pixels
