რუსი მწერალი, ბორის აკუნინი [გრიგორი ჩხარტიშვილი], სოციალურ ქსელში საქართველოში ე.წ. უცხოეთის გავლენის აგენტების კანონპროექტის განხილვის პროცესებს ეხმაურება:
„რამდენიმე ქართულმა ტელევიზიამ და მედიასაშუალებამ მომმართა „უცხოური აგენტების შესახებ“ კანონპროექტზე კომენტარის თხოვნით.
როგორც წესი, ქართულ პოლიტიკურ ცხოვრებაზე არ ვლაპარაკობ. ჯერ ერთი, მე მაქვს კომპლექსი, რომ „ნამდვილი ქართველი არ ვარ“ – ენაც კი არ ვიცი. მეორეც, მეც რუსი მწერალი ვარ და ჩვენი ძმის ნებისმიერი ჩარევა სხვა ადამიანების საქმეებში არსებულ ვითარებაში აღიქმება როგორც „იმპერიალიზმის გამოვლინება“.
მაგრამ საქართველო ჩემთვის უცხო არ არის. დავიბადე საქართველოში, ვარ „შვილი“ და „შალვოვიჩი“, იქ ბევრი ნათესავი და მეგობარი მყავს. და ჩემთვის შემაშფოთებელია ვხედავდე, როგორ ცურდება დემოკრატიული ქვეყანა იმავე ფერდობზე, საიდანაც რუსეთი უფსკრულში ჩავარდა.
ჩვენ უნდა გვეშინოდეს არა პოლიტიკური ოპოზიციის ან ბასრკბილებიანი პრესის, არამედ პუტინიზმის. გეშინოდეთ არა მხოლოდ გარედან შემოჭრის, არამედ შიგნიდან შემოჭრის. და ზუსტად ეს ხდება ახლა. პუტინიზმი ცდილობს თქვენს სახლში დაიდოს ბინა – თქვენივე ხელისუფლების ინიციატივით.
თქვენ ამ ინფილტრატორს მერე ვეღარ გამოასახლებთ. ის სიმსივნესავით გამოჭამს საქართველოს. ვიცით, გამოვიარეთ. ჯერ „უცხოური აგენტები“, შემდეგ „მეხუთე კოლონა“, შემდეგ „ტერორისტები და ექსტრემისტები“. მერე კი საქართველოს აღარ დარჩება არანაირი მეგობარი, პუტინის რუსეთის გარდა. კეთილი იყოს თქვენი მობრძანება ორთავიანი არწივის ფრთის ქვეშ.
ქართველებო, უფლება არ მისცეთ ეს დაგმართონ. მოუფრთხილდით თავისუფლებას“, – წერს მწერალი.
გასული წლის დეკემბერში, ბორის აკუნინი რუსეთის „ექსტრემისტთა და ტერორისტთა“ რეესტრში შეიყვანეს.
აკუნინს, რომელიც რუსეთის ხელისუფლებას აკრიტიკებს და საჯაროდ ეწინააღმდეგება უკრაინაში სრულმასშტაბიან შეჭრას, მოსკოვის რაიონულმა სასამართლომ დაუსწრებლად მიუსაჯა წინასწარი პატიმრობა. იქამდე რუსეთში მისი წიგნების გაყიდვა და გამოცემა შეჩერდა.
მწერალი ამჟამად რუსეთიდან გაქცეულია.
