დღეს, 9 აპრილს, თბილისში, საქართველოს ათასობით მოქალაქე გამოვიდა საპროტესტო აქციაზე. ისინი „ქართული ოცნების“ მიერ ხელმეორედ ინიციირებულ რუსული კანონპროექტის განხილვას აპროტესტებენ და აცხადებენ, რომ არა მარტო ეს კანონპროექტია რუსული, არამედ თავად ხელისუფლებაც რუსულ ინტერესებს ატარებს.
„დიახ, ეს კანონი ნამდვილად არის რუსული და ეს ხელისუფლებაც ნამდვილად არის რუსული, ამ შინაარსით“ – ამბობს აქციაზე მყოფი ნანა მალაშხია, ქალი, რომელიც გასული წლის მარტის აქციებზე, წყლის ჭავლის წინ იდგა ევროკავშირის დროშით და რუსულ კანონს აპროტესტებდა.
„ხედავთ, რამდენი ადამიანია გამოსული ქუჩაში, ჩვენ აი, ამ ბავშვების უკეთესი მომავლისთვის ვართ გამოსული და 35 წლის შემდეგ ისევ გვიწევს თავისუფლებისთვის და დამოუკიდებლობისთვის ბრძოლა, მაგრამ ჩვენ, ერთხელ და სამუდამოდ ვეტყვით რუსეთს – „არა!“ და ჩვენ ქვეყანას აუცილებლად გავხდით ევროპული ოჯახის ნაწილად.
ყველაფერს გავაკეთებთ, რომ ჩვენმა შვილებმა იცხოვრონ ევროპაში“ – ამბობს აქციის მონაწილე ქალი.
„დღეს 9 აპრილს, როდესაც ამდენი ადამიანი შეეწირა საქართველოს დამოუკიდებლობას, სიმბოლურია, რომ ისევ ამდენი ხალხი გამოვიდა ჩვენი ქვეყნის დამოუკიდებლობის დასაცავად, ევროპული მომავლისთვის. აი, ეს არის ქართული საზოგადოება, რომელიც არ დაუშვებს რუსულ კანონს არასდროს“ – ამბობს აქციის კიდევ ერთი მონაწილე.
„ჩვენი მიზანია გავხდეთ ევროკავშირის წევრი ქვეყანა. ახლა რა კანონსაც განიხილავენ, ეს არის ქართველი ხალხის და ახალგაზრდების წინააღმდეგ მიმართული, რომელიც გვავნებს. არა მავნებელ მთავრობას“- ამბობს აქციის მონაწილე სტუდენტი.
„საქართველოს ევროპული მომავლისთვის ბრძოლა არ უნდა შევაჩეროთ“- ამბობს აქციაზე მყოფი ლაზარე გრიგორიადისის დედაც.
აქციის მონაწილეთა განცხადებით საზოგადოება არ შეეგუება ევროპული მომავლის დაკარგვას.
- რა ხდება
საქართველოს საპარლამენტო უმრავლესობა „უცხოური გავლენის აგენტების“ შესახებ რუსული კანონის სხვა სახელწოდებით დაბრუნებას ცდილობს.
ანალოგიური კანონპროექტი, რომელიც დამოუკიდებელ მედიასა და არასამთავრობო ორგანიზაციებს ამჯერად „უცხოური ინტერესების გამტარ ორგანიზაციებად“ მონიშნავს, „ქართულმა ოცნებამ“ შარშანაც დააინიციირა, თუმცა მასობრივი საპროტესტო აქციების შემდეგ ჩააგდო.
_________________
ფოტო: ნეტგაზეთი
