ხომ არ ვიფიქროთ „იაფი სახლის“ რაღაც ნაწილის საბინაო ფონდით ჩანაცვლებაზე? – ეს წინადადება ბათუმის საკრებულოს წევრმა ვაჟა დარჩიამ საკრებულოს საფინანსო-საბიუჯეტო კომისიის სხდომაზე გააჟღერა.
ამ სხდომაზე მომავალი წლის ბიუჯეტის პროექტის პირველი ვარიანტი საბოლოოდ განიხილეს და შენიშვნებით დაუბრუნეს მერიას.
საკითხის მომხსენებელმა, მერიის საფინანსო-საბიუჯეტო სამსახურის უფროსმა, ვაჟა დარჩიას უპასუხა, რომ მას, როგორც მერის სათათბირო საბჭოს წევრს აქვს ინფორმაცია, რომ საბინაო ფონდიდან ბინებს ავარიულ სახლში მცხოვრებ მოქალაქეებს სთავაზობენ.
საკრებულოს წევრებმა ოპოზიციიდან განაცხადეს, რომ ეს მათთვის სიახლეა და საბინაო ფონდის „ავარიული სახლების პროგრამისთვის“ გამოყენებაზე ამ დრომდე არაფერი იცოდნენ.
„ზედმეტი შენობები რომ არ ავაშენოთ და რესურსი არ დავხარჯოთ, ამისთვის საბინაო ფონდით დავაკმაყოფილოთ პროგრამის ბენეფიციარები“, – განაცხადა ვაჟა დარჩიამ სხდომაზე. ის არ ეთანხმება საბინაო ფონდის „ავარიული სახლების ჩანაცვლების პროგრამისთვის“ გამოყენებას და მიიჩნევს, რომ ამ შემთხვევაში უმჯობესია რესურსი ძირითადად იმ ინვესტორებმა დახარჯონ, რომლებიც მონაწილეობენ პროგრამაში.
„ავარიული სახლების“ პროგრამას მერია ორი მიმართულებით ახორციელებს. ერთ შემთხვევაში პროგრამა ითვალისწინებს შეღავათებს იმ კომპანიებისთვის, რომლებიც ავარიულ სახლებს აითვისებენ, ხოლო მეორე შემთხვევაში მერია საბიუჯეტო სახსრებით ითვისებს ისეთ სახლებს, სადაც სამხარაულის ექსპერტიზის დასკვნის მიხედვით, მდგომარეობა საგანგაშოა და სახელმწიფო შესყიდვის ფარგლებში აფინანსებს ახალი სახლით ჩანაცვლებას.
ინვესტორის მონაწილეობის შემთხვევაში, თუ მერია პროექტს კ2 კოეფიციენტს გაუზრდის, უფლება ექნება ნამატი ფართობის 10 პროცენტის საბინაო ფონდში დარეგისტრირება მოითხოვოს. ამ დრომდე საკრებულოში განხილული პროექტების მიხედვით, ასეთი ფართობი მომავალ წლებში მერიამ რამდენიმე კორპუსში უნდა მიიღოს.
თუმცა მერია ვერ აკონკრეტებს, ამ დროისთვის დამტკიცებული პროექტების მიხედვით, დაახლოებით რა ფართობს ელოდება საბინაო ფონდში კ2 კოეფიცენტის გაზრდის სანაცვლოდ მხოლოდ ავარიული სახლების პროგრამიდან. არც ის ვიცით, რამდენი ბინა აქვს მერიას საბინაო ფონდში.
ვაჟა დარჩია ამბობს, რომ ამ მოცემულობის გათვალისწინებით შესაძლებელია ფონდში არსებული სახლების „იაფი სახლის“ პროგრამისთვის გამოყენება. რას უპასუხებს მერია ამ შეთავაზებას, ჯერჯერობით არ ვიცით. საფინანსო-საბიუჯეტო სამსახურის ხელმძღვანელმა სხდომაზე განმარტა, რომ მის კომპეტენციაში არ შედის ამ საკითხზე პასუხის გაცემა.
დღეს, 22 ნოემბერს, სხდომაზე კიდევ ერთხელ განმარტეს, რომ მერია „იაფი სახლის“ პროგრამას არ წყვეტს და მის დაფინანსებას ბიუჯეტში მას შემდეგ ასახავს, როცა მშენებლობისთვის ადგილს მოიძიებს.
2024 წლის ბიუჯეტის ახალი კორექტირებული ვარიანტი მერიამ საკრებულოში 10 დეკემბრამდე უნდა შეიტანოს.
