ანომალიური სიცხის გამო ბრაზილიის დიდ ნაწილში განგაშის წითელი დონეა გამოცხადებული – ამის შესახებ „ბიბისი“ წერს.
12 ნოემბერს რიო დე ჟანეიროში ნოემბრის რეკორდული ტემპერატურა დაფიქსირდა – 42,5 გრადუსი ცელსიუსით.
მეტეოროლოგიის ეროვნული ინსტიტუტის ცნობით, სან-პაოლოში 14 ნოემბერს, ნაშუადღევს, საშუალო ტემპერატურა 37.3°C იყო. მეტეოროლოგები ვარაუდობენ, რომ სიცხის ტალღა სავარაუდოდ, კვირის ბოლომდე გასტანს.
მეცნიერები მიიჩნევენ, რომ ბევრ რეგიონში უჩვეულოდ ცხელი პერიოდი უფრო გრძელი და ინტენსიური ხდება და ეს გაგრძელდება მანამ, სანამ მიმდინარეობს სათბურის გაზების გამოყოფა ატმოსფეროში, რაც ათბობს პლანეტას.
„ბიბისის“ ცნობით, ამჟამინდელი სიცხის ტალღა დაკავშირებულია ციკლურ ელ-ნინიოს ეფექტთან, რაც იწვევს გვალვას ამაზონის ნაწილებში და ჭარბ ნალექს სამხრეთ-აღმოსავლეთ ბრაზილიაში.
____________
ფოტო: EPA-EFE/Antonio Lacerda
