მთავარი,სიახლეები

რას იხსენებს კემბრიჯის უნივერსიტეტის სტუდენტი „თავისუფალ ჟურნალისტთა სახლზე“

11.11.2023 •
რას იხსენებს კემბრიჯის უნივერსიტეტის სტუდენტი „თავისუფალ ჟურნალისტთა სახლზე“

თათია ბოლქვაძე კემბრიჯის უნივერსიტეტის მაგისტრია საერთაშორისო განვითარების მიმართულებით. სწავლობდა კოლეჯებში, სინგაპურსა და უელსში. ბაკალავრიატი ოქსფორდის უნივერსიტეტში ისწავლა. დამთავრებული აქვს საერთაშორისო ურთიერთობებისა და პოლიტიკის მეცნიერების ფაკულტეტი.

თათია ამბობს, რომ მისი საგანმანათლებლო გზა 14 წლის ასაკში ჯერ „ბათუმელების“ მედიასკოლაში, მედიასკოლიდან კი „თავისუფალ ჟურნალისტთა სახლში“ დაიწყო.

„14 წლის ვიყავი, როცა „თავისუფალ ჟურნალისტთა სახლში“ მოვხვდი. მაშინ ძალიან დაინტერესებული ვიყავი ჟურნალისტიკით, საკმაოდ პატარა ვიყავი, ინტერვიუების ჩაწერის დიდი გამოცდილება არ მქონდა. როცა „თავისუფალ ჟურნალისტთა სახლში“ მივედი დამხვდა გარემო, სადაც მასწავლიდნენ და მხარს მიჭერდნენ ჩემი იდეების განხორციელებაში.

თანამშრომლები ყველაფერ აკეთებდნენ იმისათვის, რომ რაღაცები გამოგვეცადა, რაც არ უნდა რთული ყოფილიყო დავალება, ჩვენი მაქსიმუმი ჩაგვედო მასში. მხარს გვიჭერდნენ იმაში, რომ განვვითარებულიყავით. გვესწავლა არამარტო ჟურნალისტიკის საფუძვლები, არამედ როგორც კარგი ადამიანები, ისე ჩამოვყალიბებულიყავით.

მახსოვს, მომცეს საშუალება მემუშავა ცხოველთა უფლებების საკითხზე. ჩემთვის ეს შესაძლებლობა ძალიან მნიშვნელოვანი იყო, რადგან ყველა ორგანიზაცია არ მოგცემდა საშუალებას შენ რა თემაც გაინტერესებს მარტო იმ თემაზე გემუშავა,“ – იხსენებს თათია ბოლქვაძე.

თათიას თქმით, ის, რაც ასევე ფასდაუდებელია მისთვის, არის ჩართვა სამოქალაქო აქტივობებში.

„იყო პროექტები ადამიანის უფლებების და სამოქალაქო უფლებების მიმართულებით. ამ ყველაფერში მონაწილეობით, უფრო მეტი გავიგე დასავლური ღირებულებების შესახებ. უფრო ტოლერანტი გავხდი. ძალიან ბევრ სხვადასხვა ეროვნების, სხვადასხვა შეხედულების მქონე ხალხთან მქონდა ურთიერთობა. ამ ხალხთან ურთიერთობის გზებიც მასწავლა „თავისუფალ ჟურნალისტთა სახლში“ ყოფნამ.

პირველად სინგაპურში წავედი სასწავლებლად. მაშინ მონაწილეობა მივიღე გაერთიანებული მსოფლიო კოლეჯების პროგრამაში, საქართველოში  მესამე თუ მეოთხე წელი იყო, რაც ტარდებოდა ეს პროგრამა. მსოფლიოს ასი სხვადასხვა ქვეყნიდან ირჩევენ ბავშვებს ყოველწლიურად. 18 კოლეჯი აქვთ მსოფლიოს გარშემო. ამ 18-იდან ერთ-ერთ კოლეჯში მოვხვდი სრული დაფინანსებით. მომეცა შანსი მესწავლა სხვადასხვა წარმომავლობის ხალხთან ერთად.

ეს პროგრამა აქცენტს აკეთებდა ღირებულებებზე. სინგაპურში მულტიკულტურულ გარემოში მოვხვდი. ძალიან გამომადგა ყველაფერი, რაც „თავისუფალ  ჟურნალისტთა სახლში“ ვისწავლე. ყველაფერი, რასაც თეორიულად ვსწავლობდით და მუშაობის დროს ვცდილობდით, რომ სხვა ხალხშიც ჩაგვენერგა, მქონდა საშუალება, რეალურ ცხოვრებაში თავად გამომეცადა.

„თავისუფალ  ჟურნალისტთა სახლი“ რომ არ ყოფილიყო ჩემ ცხოვრებაში, მგონი ის რაღაცები არ მოხდებოდა, რაც მოხდა. ერთი მხრივ, ღირებულებები ჩამომიყალიბა და მეორე მხრივ, უფრო თავდაჯერებული გამხადა, უფრო მეტად კომფორტული გამხადა იმაში, რომ ახალი და რთული რაღაცები გამომეცადა,“ – ამბობს თათია ბოლქვაძე.

თათიას თქმით, უმნიშვნელოვანესია ისეთი ორგანიზაციების არსებობა, რომელიც არაფორმალური განათლების მიღებაში ეხმარება ახალგაზრდებს.

„14-17 წელი ახალგაზრდის ცხოვრებაში გარდამტეხი პერიოდია. დამოუკიდებელი და მიუკერძოებელი აზროვნება არის ყველაზე მთავარი, რაც მაგ ასაკში გჭირდება. კრიტიკული აზროვნების უნარი რომ ჩამოვიყალიბე აი, მართლა ყველაზე დიდი საჩუქარია ჩემთვის ამ ორგანიზაციაში მიღებული გამოცდილებიდან.

მგონია, რომ ის ღირებულებები, რაც ჩამომიყალიბდა მაშინ „თავისუფალ ჟურნალისტთა სახლის“ დამსახურებით, დიდად არ შეცვლილა და ყოველთვის კომპასად ვიყენებ თითქოს ცხოვრებაშიც ამ ყველაფერს.

მაშინ ჩვენი მიზანი იყო, რომ პოზიტიური ცვლილება შემოგვეტანა აჭარაში, ამ პატარა თემში. ახლა რაც უფრო ფართოვდება ჩემი არეალი, უფრო მეტად ვრწმუნდები, რომ რასაც ვაკეთებ, ყოველთვის უნდა იყოს იმისთვის, რომ რომელიღაცა თემს დაეხმაროს უკეთესი საცხოვრებელი და უკეთესი საარსებო პირობების შექმნაში.

ამიტომ ვემადლიერები განსაკუთრებით „თავისუფალ ჟურნალისტთა სახლს“. გარდა იმისა, რომ კარგი პროექტები ჰქონდათ, სწორი ღირებულებების მქონე ადამიანები იყვნენ ამ პროექტებში ჩართულები,“ – ამბობს თათია ბოლქვაძე.

„თავისუფალ ჟურნალისტთა სახლის“ შესახებ 

თავისუფალ ჟურნალისტთა სახლი უკვე 22 წლისაა.

„თავისუფალ ჟურნალისტთა სახლი“ იყო პირველი არასამთავრობო ორგანიზაცია აჭარაში, რომელიც გაზეთ „ბათუმელების“ ჟურნალისტებმა დააფუძნეს 2001 წლის 20 ოქტომბერს.

ორგანიზაციამ ოფიციალური რეგისტრაცია ბათუმის სასამართლოში  2001 წლის 20 ნოემბერს გაიარა.

„თავისუფალ ჟურნალისტთა სახლის“ ორგანიზებით მოეწყო საპროტესტო მსვლელობა აჭარის ტელევიზიაში არსებული ცენზურის წინააღმდეგ. 2009 წლის „ვარდების რევოლუციის“ შემდეგ ეს იყო  ერთადერთი შემთხვევა მთელ ქვეყანაში, ვინც  მედიასფეროში არსებული ცენზურა გააპროტესტა.

აჭარის რევოლუციის დროს ორგანიზაცია მასპინძლობდა უცხოური (ნიუ-იორკ თაიმსის, ბი-ბი-სის, ფრანს-პრესის, კომერსანტის, დოიჩე ველეს) და საქართველოს ნაციონალურ საინფორმაციო საშუალებების ჟურნალისტებს და მათ მუშაობის პროცესში ეხმარებოდა.

დაფუძნების მომენტიდან „თავისუფალ ჟურნალისტთა  სახლმა“  სხვადასხვა პროექტის განხორციელების პარალელურად ჩაატარა არაერთი ტრენინგი ჟურნალისტებისთვის, გამართა მრგვალი მაგიდა და კონფერენციები. ორგანიზაცია ახორციელებდა და ახორციელებს თავის საქმიანობას შემდეგი მიმართულებით.

  • ინფორმაციის თავისუფლებისა და გამჭვირვალობის ხელშეწყობა;
  • ჟურნალისტების პროფესიული დონის ამაღლება და დაოსტატება;
  • სამოქალაქო საზოგადოების ფორმირების ხელშეწყობა;

სამოქალაქო საზოგადოების განვითარების ხელშეწყობის მიზნით სხვადასხვა სახის კონსულტაციას უწევს დაინტერესებულ მოქალაქეებს, როგორც მათი ინფორმირების, ასევე უფლებების დაცვის კუთხით.

ორგანიზაციას დღემდე 60-მდე პროექტი აქვს განხორციელებული.

გადაბეჭდვის წესი


ასევე: