მთავარი,სიახლეები

„უნდა მოუსმინოთ პალესტინელებსაც“ – ფრანკფურტის წიგნის ბაზრობა სკანდალით გაიხსნა

18.10.2023 • 4965
„უნდა მოუსმინოთ პალესტინელებსაც“ – ფრანკფურტის წიგნის ბაზრობა სკანდალით გაიხსნა

გერმანული მედიის ცნობით, 17 ოქტომბერს ფრანკფურტის ცნობილი წიგნის ბაზრობა სკანდალით გაიხსნა.

„დოიჩე ველეს“ ცნობით, წელს წიგნის ბაზრობის მასპინძელი ქვეყანა სლოვენიაა და სკანდალი სწორედ სლოვენიელი ფილოსოფოსის, სლავოი ჟიჟეკის გამოსვლას მოჰყვა.

გამოცემის ცნობით, გამოსვლისას ჟიჟეკმა დაგმო „ჰამასის“ ტერაქტი ისრაელის მოსახლეობაზე, თუმცა ხაზგასმით აღნიშნა, რომ „ასევე უნდა მოუსმინოთ პალესტინელებს და გაითვალისწინოთ მათი წარსული, თუ გსურთ კონფლიქტის გაგება“.

„დოიჩე ველე“ წერს, რომ სლოვენიელი ფილოსოფოსის გამოსვლისას ზოგიერთმა სტუმარმა პროტესტის ნიშნად დარბაზი დატოვა.

ჰესენის მიწის კომისარი ანტისემიტიზმთან ბრძოლის საკითხებში, უვე ბეკერი ცდილობდა ეპასუხა ჟიჟეკისთვის – ჯერ დარბაზიდან, შემდეგ კი ტრიბუნიდან. ბეკერმა ჟიჟეკი „ჰამასის“ დანაშაულების შემსუბუქების მცდელობაში დაადანაშაულა. ჟიჟეკმა კატეგორიულად უარყო ეს ბრალდება და დაჟინებით აცხადებდა, რომ ახლო აღმოსავლეთში მშვიდობა არ იქნება პალესტინის საკითხის გადაწყვეტის გარეშე.

სლოვენიელი ფილოსოფოსის თქმით, ტერორისტული თავდასხმები საშინელი დანაშაულია და ისრაელს აქვს საკუთარი თავის დაცვის სრული უფლება, მაგრამ იმის გასაგებად, თუ რა ხდება იქ, ჩვენ ასევე უნდა გადავხედოთ პალესტინელების წარსულს.

ჟიჟეკმა, რომელიც ცნობილი გერმანული გაზეთის, WELT-ის მუდმივი თანამშრომელია, დაადანაშაულა ჰესენის კომისარი, რომ ის „არ უყურებს მოვლენებს პესპექტივაში“.

იმავე დღეს, ბეკერმა გერმანულ სააგენტო dpa-სთან ინტერვიუში განაცხადა, რომ „სიტყვის თავისუფლებას აქვს საზღვარი, თუ ეს თავისუფლება განიხილავს საგნებს კონტექსტში, რომელიც ამარტივებს და ატოლებს მათ იქ, სადაც მათი დატოლება შეუძლებელია“.

გერმანული მედია, მათ შორის გაზეთი WELT-ი, წერს, რომ ჯერ კიდევ თავის გამოსვლამდე სლავოი ჟიჟეკმა გააკრიტიკა ამ თემაზე „ანალიზის აკრძალვა“.

ჟიჟეკი წუხდა, რომ ყველა მისი წინა გამომსვლელი საუბრობდა ისრაელზე, მაგრამ არცერთი არ საუბრობდა პალესტინელებზე. ის ასევე მიიჩნევს, რომ სკანდალურია პალესტინელი მწერლის, ადანია შიბლისთვის დაჯილდოების ცერემონიის გაუქმება რომანისთვის – “უმნიშვნელო დეტალი”.

„დოიჩე ველეს“ ცნობით, ჟიჟეკმა თავის გამოსვლაში თქვა, რომ ამაყობს წიგნის ბაზრობაზე ყოფნით, მაგრამ აღნიშნა, რომ „ასევე რცხვენია აქ ყოფნის“.

წიგნის ბაზრობის დირექტორმა იურგენ ბოსმა მომხდარის შემდეგ განაცხადა, რომ ფრანკფურტის წიგნის ბაზრობა სიტყვის თავისუფლების ადგილია და „ჩვენ უნდა შეგვეძლოს აზრის გამოხატვა“. მან ასევე აღნიშნა, რომ მადლიერი იყო როგორც მაყურებლის – პროტესტისთვის, ასევე იმისათვის, რომ დარბაზში მყოფებმა შეძლეს სლოვენიელი ფილოსოფოსის გამოსვლის ბოლომდე მოსმენა.

„მნიშვნელოვანია, რომ ერთმანეთს მოვუსმინოთ“, – თქვა წიგნის ბაზრობის დირექტორმა.

________________

ფოტო: EPA-EFE/HAYOUNG JEON

გადაბეჭდვის წესი


ასევე: