ბათუმის ახალ ბულვარში სკეიტპარკს ტენდერში გამარჯვებული შპს „ანაგი“ ააშენებს. ბათუმის ბულვარს კომპანიასთან ხელშეკრულება 3,1 მილიონ ლარზე აქვს გაფორმებული.
სამუშაოები უკვე დაწყებულია და ხელშეკრულების მიხედვით 2024 წლის 21 თებერვლამდე უნდა დასრულდეს.
ახალ ბულვარში სკეიტპარკის მშენებლობა დაიწყო / 7.10.2023
ახალ ბულვარში სკეიტპარკის მოსაწყობად თავდაპირველი ტენდერი ბულვარის ადმინისტრაციას 1 291 749 ლარით ჰქონდა გამოცხადებული, თუმცა ტენდერი არ შედგა – მასში მონაწილეობა არავინ მიიღო.
სკეიტპარკის მოწყობაზე ხელახალი ტენდერი ბათუმის ბულვარმა 3 165 138 ლარით გამოაცხადა, რაც 1,8 მილიონი ლარით მეტი იყო წინა ტენდერის სავარაუდო ღირებულებასთან შედარებით. ბულვარის ადმინისტრაციაში მაშინ გვითხრეს, რომ მიიღეს დამატებითი რეკომენდაციები, მათ შორის მსოფლიო სკეიტბორდის ფედერაციისგანაც და პროექტსა და ხარჯთაღრიცხვაში ცვლილება შეიტანეს.
კომპანია „ანაგთან“ ხელშეკრულება ზუსტად იმ თანხით გაფორმდა, რა თანხაც ტენდერში სავარაუდო ღირებულებად იყო დაფიქსირებული – 3 165 138 ლარი. შესყიდვების პორტალის მიხედვით ტენდერში მხოლოდ „ანაგი“ მონაწილეობდა.
გამწვანება სკეიტპარკისთვის შემოღობილ ტერიტორიაზე ახალ ბულვარში / 7.10.2023
სამშენებლო ტერიტორია ახალ ბულვარში, რომელიც დღეს შემოღობილია და მშენებლობა მიმდინარეობს, დაახლოებით 5 ათასი კვადრატული მეტრია. ტერიტორიის ძირითადი ნაწილი კი, გამწვანებულია.
ბულვარის პრესსამსახურში „ბათუმელებს“ უთხრეს, რომ მშენებლობისთვის შემოსაზღვრული ტერიტორიიდან ნარგავების ნაწილი უკვე გადარგეს და ხე-მცენარეების გადარგვა საჭიროებისამებრ, პროექტის შესაბამისად გაგრძელდება.
ახალ ბულვარში სკეიტპარკის მშენებლობა დაწყებულია / 7.10.2023
უშუალოდ პროექტსა და ხარჯთაღრიცხვის მომზადებაში თავის დროზე ბულვარს 106 ათას 200 ლარი აქვს გადახდილი.
ამავე თემაზე:
