დღეს, 3 ოქტომბერს, ძლიერი წვიმის შედეგად ქობულეთი ისევ დაიტბორა.
როგორც მოქალაქეები „ბათუმელებთან“ საუბარში ამბობენ, ამ დროისთვის ქალაქში გადაადგილება შეფერხებულია.
„მე ბაზრის მიმდებარე ტერიტორიაზე ვიმყოფები და ვერ გავდივარ გარეთ. ცოტა ხნის წინ იკლებდა წყლის დონე, თუმცა ახლა ისევ გაძლიერდა წვიმა და ალბათ კიდევ აიწევს წყალი“, – ამბობს ანჟელა ხაჯიშვილი.
როგორც ქობულეთის მერიაში აცხადებენ, ამ დროისთვის ისევ ბაზრის მიმდებარე ტერიტორიაა დატბორილი. „მობილიზებულია სახანძრო-სამაშველო ჯგუფები და წყლის დონის მატების შემთხვევაში დაიწყება გაწმენდითი სამუშაოები“.
მერიის ინფორმაციით, რამდენიმე სოფელში არსებობს მეწყრის განვითარების საფრთხეც. „კონკრეტული სოფლების შესახებ ინფორმაციას ვაზუსტებთ“, – განაცხადეს მერიაში.
