ნეტგაზეთი • RU

გონიოელები საპროტესტო აქციას აჭარის მთავრობასთანაც გამართავენ

ამ დრომდე გაურკვეველია, როდის გაიმართება ბათუმის საკრებულოს მიწის საკუთრების აღიარების კომისიის სხდომა, სადაც გონიოელების სადავო მიწის საკითხი უნდა გადაწყდეს. კომისიის თავმჯდომარე, ლევან კინწურაშვილი 15 ივნისს დაჰპირდა მოსახლეობას, რომ კომისია საბოლოო გადაწყვეტილებას 21 ივნისს მიიღებდა. გუშინ საკრებულოში არც კომისიის სხდომა გამართულა და არც განმარტება გაუკეთებია ვინმეს, თუ რატომ ვერ შედგა სხდომა, ან როდის შეიკრიბება კომისია.

გონიოელებმა მჯდომარე საპროტესტო აქცია საკრებულოს შენობასთან 14 ივნისს დაიწყეს და კარავიც გაშალეს. ისინი არც კინწურაშვილის დაპირების მოსმენის შემდეგ დაშლილან. „გუშინ ღამით მოვიდა ლევან კინწურაშვილი და უთხრა აქ შეკრებილებს, ყველაფერი მზადაა, თბილისიდან თანხმობას ველოდებითო,“ – ამბობს გონიოელი ენვერ ირემაძე.

ენვერ ირემაძის თქმით, საკრებულოს შენობასთან შეკრებილების ერთი ჯგუფი დღის 2 საათზე აჭარის მთავრობის შენობასთანაც გამართავს საპროტესტო აქციას. ისინი არჩილ ხაბაძისგან დაპირების შესრულებას მოითხოვენ.

ნეტგაზეთის მასალების სხვა გამოცემებში გადაბეჭდვის წესი
ავტორი