სარაგბო კლუბ „ბათუმს“ მერიამ 635 000 ლარი დაუმატა. ბიუჯეტში ცვლილების მიხედვით, რომელიც ბათუმის საკრებულომ 21 ივლისს დაამტკიცა, კლუბს ძირითადი გუნდის შრომის ანაზღაურების ფონდში 375 000 ლარი დაუმატეს.
გარდა ამისა, 70 000 ლარით დაფინანსდა გუნდის ეკიპირება, 60 000 ლარი – სამივლინებო ხარჯებისთვის, ბავშვთა ასაკობრივი ჯგუფების შიდა სატურნირო და სპორტული ღონისძიებების ხარჯის ნაწილში კი კიდევ 130 000 ლარი გაითვალისწინეს.
სარაგბო კლუბ „ბათუმის“ ხელმძღვანელის, გელა ქობულაძის ინფორმაციით, კლუბები მუდმივად ცდილობენ მორაგბეებთან მოლაპარაკებას, სთავაზობენ მაღალ ანაზღაურებას იმისთვის, რომ გამოცდილი მორაგბეები თავიანთ კლუბში გადაიყვანონ. ამიტომაც კლუბს ახალი სეზონისთვის სახელფასო ფონდის გზარდა დასჭირდა:
„მოგეხსენებათ, სარაგბო კლუბი „ბათუმი“ ბოლო წლებში დგას მოწინავე სიმაღლეზე. ბოლო ოთხი წლის განმავლობაში კლუბმა ითამაშა საქართველოს ჩემპიონატის „დიდი 10-ის“ ფინალში სადაც ორჯერ დაეუფლა ჩემპიონის ტიტულს, ხოლო ორჯერ – ვიცე-ჩემპიონის. გასული სეზონის ვიცე-ჩემპიონობიდან გამომდინარე კლუბი გეგმავს მომავალ სეზონშიც წარმატებით იასპარეზოს.
ბათუმელების და ერთგული გულშემატკივრების გასახარებლად თასის უკან დაბრუნებას ვგეგმავთ. ამისთვის თანხების დამატებით მობილიზება გახდა საჭირო.“
სარაგბო კლუბ ბათუმში ირიცხება 450 მოზარდი ბავშვი, რომლებიც ჩართულები არიან საქართველოს რაგბის კავშირის მიერ დაგეგმილ საქართველოს ჩემპიონატებში და ფესტივალებში.
გელა ქობულაძის თქმით, „ისინი წარმატებით ასპარეზობენ, ამიტომაც თანხის გაზრდა ბავშვთა მივლინების მუხლშიც დასჭირდათ.“
სარაგბო კლუბები სექტემბრიდან მაისის თვის ჩათვლით ასპარეზობენ. გუნდმა მიმდინარე სეზონი 2022-2023 წელს დაასრულა.
ამ დროისთვის სარაგბო კლუბ „ბათუმში“ 160 პირია დასაქმებული, მათ შორის 34 მორაგბეა.
გელა ქობულაძის ინფორმაციით, მორაგბეების ხელფასი, მათი გამოცდილების მიხედვით, 1000 ლარიდან 5500 ლარამდე მერყეობს. კლუბი ბიუჯეტი სრულად მილიონამდე ლარია.
