დღეს, 28 ივნისს, მოსამართლე ლევან ყოლბაიამ მოწმეების გამოკითხვა დაასრულა ხელვაჩაურში „ნახევარი მილიონის მითვისების საქმეზე“
ამ საქმეზე დასაკითხი მხოლოდ ბრალდებული დარჩა – ხელვაჩაურის წყლის ყოფილ უფროსს, ვლადიმერ მიქელაძეს ჩვენების მიცემა სურს, თუმცა დღევანდელ პროცესზე, სამუშაო საათების ამოწურვის მოტივით, მისი მოსმენა გადაიდო.
„მოხალისეები გვეხმარებოდნენ მხოლოდ, ადგილობრივი მოსახლეობა“, – ერთ-ერთი ოპერატორ-დეზინფექტორის, ამირან ცინარიძის ჩვენება წაუკითხა დღევანდელ სხდომაზე პროკურომა თორნიკე გოგეშვილმა მოსამართლეს იმის საილუსტრაციოდ, რომ კონკრეტულ წყალსადენზე 22 ადამიანი ფიქციურად იყო დასაქმებული.
ამირან ცინარიძე ხელვაჩაურში, სოფელ წინსვლაში მუშაობს წყალსადენზე და რეზერვუარსაც ასუფთავებს. მან ჩვენება პროკურატურას მისცა, თუმცა სასამართლოში მისი წარმოდგენა ვერ მოხერხდა.
„მას დატოვებული აქვს საქართველოს სახელმწიფო საზღვარი, ვერ ვუკავშირდებით“, – მიმართა მოსამართლე ლევან ყოლბაიას პროკურორმა თორნიკე გოგეშვილმა. პროკურორმა მოწმის ჩვენების საჯაროდ წაკითხვის ნებართვა მიიღო.
მოწმე ამირან ცინარიძის თქმით, წყლის რეზერვუარს მხოლოდ ორი ადამიანი უვლიდა, ფორსმაჟორში კი, მათ მხოლოდ ადგილობრივი მოსახლეობა ეხმარებოდა უსასყიდლოდ.
მოწმემ უარყო წინსვლის წყალსადენზე 22 ადამიანის მუშაობა. მისთვის პროკურორს კონკრეტული სახელები და გვარები დაუსახელებია, ვისთანაც შრომითი ხელშეკრულებები იყო გაფორმებული. მოწმეს უთქვამს, რომ „დასაქმებულები“ წყალსადენთან არასდროს უნახავს.
იმავე მოწმეს პროკურატურისთვის მოუყოლია, რომ სოფელ ყოროლისთავში წყლის ახალი მილის მოწყობა და შედუღება ტენდერის გარეშე შესრულდა, ვლადიმერ მიქელაძის დავალებით.
„1800 ლარი სამმა ადამიანმა გავინაწილეთ, ასევე 300 ლარამდე პროდუქტი გამოვიტანეთ სურსათის მაღაზიიდან…“, – წაიკითხა პროკურორმა მოწმის ჩვენებიდან.
ამ საქმეზე გამოსაკითხი იყვნენ გამომძიებლებიც, თუმცა პროკურორმა ისინი მოწმეთა სიიდან ამოიღო.
რა ხდება სხვა პირების, მათ შორის, ხელვაჩაურის ყოფილი მერის პასუხისგების კუთხით? – პროკურატურა ამ ეტაპზე მხოლოდ იმას ამბობს, რომ „გამოძიება გრძელდება“.
———————-
ვლადიმერ [დავით] მიქელაძე „ხელვაჩაურის წყალკანალის“ ყოფილი უფროსია და მას გამოძიება ბიუჯეტიდან დიდი ოდენობით ფულის მითვისებას ედავება – 520 920 ლარი.
ვლადიმერ მიქელაძეს ბრალი აქვს ასევე წარდგენილი: სამსახურებრივი უფლებამოსილების ბოროტად გამოყენების, სამსახურებრივი სიყალბისა და ყალბი საგადასახადო დოკუმენტის დამზადება-გამოყენების კუთხით.
20 ივნისს ამ საქმეზე სასამართლოს ჩვენება ხელვაჩაურის წყლის“ ბუღალტერმა მისცა. სასამართლო სხდომის „ბათუმელებში“ გაშუქების შემდეგ, თანამდებობა ხელვაჩაურის მერის მოადგილემ -კახაბერ ფუტკარაძემ დატოვა. მოსამართლეს მოწმეებმა უთხრეს, რომ „ხელვაჩაურის წყალს“ კახაბერ ფუტკარაძე კურატორობდა, მისი შვილი კი, ათეულობით სხვა ადამიანის მსგავსად, ფიქციურად იყო დასაქმებული დავით მიქელაძის დირექტორობის დროს.
„ბათუმელებში“ რეპორტაჟის გამოქვეყნების შემდეგ ხელვაჩაურის მერის მოადგილის პოზიცია დატოვა კახაბერ ფუტკარაძემ, თანამდებობა დატოვა ასევე ხელვაჩაურის ყოფილმა მერმა – ჯუმბერ ვარდმანიძემ. ის აჭარის განათლების მინისტრის მრჩეველი იყო.
ამ თემაზე:
„დირექტორთან კაბინეტში შემქონდა ფული“ – მოწმე ხელვაჩაურში 520 ათასი ლარის მითვისებაზე
