ქობულეთში, ფიჭვნარის პლაჟთან მდებარე მიწის ნაკვეთი, რომელსაც აჭარის ფინანსთა სამინისტრო მეოთხე წელია ყიდის, აუქციონზე 4 მილიონ 460 ათას ლარად გაიყიდა.
11 235 კვადრატული მეტრი მიწის ნაკვეთის საწყისი გასაყიდი ფასი ამჯერად 4 მილიონ 360 ათასი ლარი, ხოლო ვაჭრობის ბიჯი 100 ათასი ლარი იყო.
მიწის ნაკვეთი ერთი ბიჯით იყიდა შპს „ნესს სიტიმ“, რომელიც უზბეკეთის მოქალაქეებმა აუქციონის გამოცხადებამდე 7 თვით ადრე [2022 წლის 23 ივნისს] დაარეგისტრირეს ქობულეთში [იურიდიული მისამართი – ჩაქვი].
კომპანიას, საჯარო რეესტრის მიხედვით, სამი დამფუძნებელი ჰყავს და სამივე უზბეკეთის მოქალაქეა [დენის ვორონინი – ფლობს „ნესს სიტის“ 20 პროცენტს და ასევე არის კომპანიის დირექტორი; სუნატილლო ტურაევი და ხაზრატჯონ ჯახონოვი კი, 40-40 პროცენტს ფლობენ].
დენის ვორონინმა 2022 წლის ოქტომბერში კიდევ ერთი კომპანია დაარეგისტრირა ბათუმში – შპს „გეუზ ინტერნეიშენალი“. ამ კომპანიის იურიდიულ მისამართად მითითებულია ბინა ბათუმში, რომლის მესაკუთრეც რუსეთის მოქალაქეა. ბინა, მშენებარე კორპუსში რუსეთის მოქალაქემ 2021 წელს იყიდა.
რაც შეეხება ფიჭვნარში გაყიდულ მიწას, აჭარის ფინანსთა და ეკონომიკის სამინისტრომ ეს ნაკვეთი აუქციონზე პირველად, 2019 წელს გამოიტანა. წინა 9 აუქციონიდან უმეტესობა არ შედგა, ერთ აუქციონზე კი, ნაკვეთი ფასდაკლებით გაიყიდა, თუმცა გამარჯვებულმა კომპანიამ ხელშეკრულებას ხელი არ მოაწერა.
„ნესს სიტიმ“ აღნიშნული ნაკვეთი პირობებით იყიდა. ნასყიდობის ხელშეკრულება აჭარის ეკონომიკის სამინისტროსთან 2023 წლის პირველ მარტსაა გაფორმებული. დღეიდან, 30 მარტიდან კი, მიწის ნაკვეთი უკვე კომპანიის საკუთრებაშია.
„ნესს სიტის“ მთავარი ვალდებულებაა:
- ხელშეკრულების გაფორმებიდან 60 თვის ვადაში შენობა-ნაგებობ(ებ)ის, [რომელიც უნდა მოიცავდეს არანაკლებ 100- ნომრიან სასტუმროს, სპორტულ-გამაჯანსაღებელ ან/და სარეაბილიტაციო ცენტრს, არანაკლებ 60 ავტომანქანაზე გათვლილ ავტოსადგომს, სკვერს] ამოქმედება და არანაკლებ 20 წლის განმავლობაში პროფილის შენარჩუნება, სადაც დასაქმებულთა არანაკლებ 90% უნდა იყოს საქართველოს მოქალაქე;
- ხელშეკრულების გაფორმებიდან 60 თვის ვადაში აღნიშნულ პროექტში არანაკლებ 20 მილიონი ლარის ინვესტიციის განხორციელება.
კომპანიის ვალდებულებები [აუქციონის პირობები] დეტალურად შეგიძლიათ ნახოთ ამ ბმულზე:
