მეწყრული პროცესები გააქტიურდა ხულოს მუნიციპალიტეტის სოფელ ჩაოში. ადგილობრივების თქმით, სოფელში თოვლის დნობისთანავე გამოჩნდა გამოჩნდა ბზარები მიწაზე და რთულ მდგომარეობაშია სოფლის საავტომობილო გზაც.
„პირველად [ხულოს მერიას] ერთი თვის წინ მივმართე, არავინ არ მიაქცია ყურადღება და ისევ განვაახლე“, – უთხრა „ბათუმელებს“ ადგილობრივმა ალექსანდრე მახარაძემ, რომლის თქმითაც სოფელში ძალიან საშიში მდგომარეობაა.
ალექსანდრე მახარაძის თქმით, სოფელში არსადაა გამართული სანიაღვრე არხები, რაც მეწყრული ნაპრალების გაჩენას, გაღრმავებას უწყობს ხელს.
ნაპრალი მიწაზე. სოფელი ჩაო
ჩაოში ცხოვრობს მზია შავაძეც, რომლის საცხოვრებელი სახლის კედელი დაიბზარა – „ისეთ მდგომარეობაში, ლამის გადავარდეს“ – გვითხრა მან.
მზიას თქმით, ხულოს მერიას განცხადებით 1 კვირის წინ მიმართა და მიიღო შეტყობინება, რომ მუნიციპალიტეტი აუცილებელ ზომებს მიიღებს.
„ამ ერთი კვირის განმავლობაში აშკარად ჩანს, რომ ბზარების სიღრმემ მოიმატა და კედელი ლამისაა გადაბრუნდეს. სამზარეულოს კედელი იყო და ოთახი მთლიანად დავცალეთ. ყოველ დილით ვიღვიძებთ იმის შიშით, თუ რა მდგომარეობა დაგვხვდება“, – გვეუბნება მზია შავაძე
მზია შავაძის საცხოვრებელი სახლის კედელი
სოფელში ახლა გეოლოგების მისვლას და დანაპრალებული მიწის შემოწმებას ელოდებიან.
„მინდა გეოლოგები მოვიდნენ და არამარტო ჩემი საცხოვრებელი სახლის მდგომარეობა, არამედ მთლიანი მიმდებარე ტერიტორია შეისწავლონ, რათა დასკვნის მომზადების შემდეგ გავიგოთ რამდენად არის აქ ცხოვრება უსაფრთხო“, – ამბობს მზია შავაძე.
აღნიშნულ საკითხზე ხულოს მერიიდან კომენტარის მიღების შემთხვევაში მასალა განახლდება.
ამავე თემაზე:
მაღალმთიან აჭარაში მეწყრული პროცესები გააქტიურდა – რას ამბობენ გეოლოგები
