თბილისში, პარლამენტთან მიმდინარე აქციაზე რუსული კანონის წინააღმდეგ, შსს-მ 6 პირი დააკავა – ინფორმაცია „ბათუმელებს“ შს სამინისტროში მიაწოდეს.
სამინისტროს ცნობით, აქციის მონაწილეები დააკავეს წვრილმანი ხულიგნობის და პოლიციელის კანონიერი მოთხოვნის დაუმორჩილებლობის მუხლებით.
შსს-ში არ აკონკრეტებენ, ვინ არიან დაკავებული, თუმცა მედიის ცნობით, დაკავებულებს შორის არის „გირჩის“ ლიდერი ზურა ჯაფარიძე.
საპროტესტო აქცია „არა რუსულ კანონს“ საქართველოს პარლამენტთან ამ წუთებშიც [00:40] გრძელდება.
დაშავდნენ აქციის მონაწილეები, თუმცა ამ ეტაპზე სასწრაფო-სამედიცინო სამსახურის პრესცენტრში ვერ მოგვაწოდეს ინფორმაცია, აქციაზე დაშავებულ ადამიანებზე.
- რა ხდება?
საქართველოს პარლამენტის 76-მა დეპუტატმა დღეს, 7 მარტს, სესიაზე პირველი მოსმენით დაუჭირა მხარი რუსულ კანონპროექტს, რომლის მიზანიც ქვეყანაში მედიისა და სამოქალაქო სექტორის დისკრედიტაცია და შეზღუდვაა.
მსგავსი კანონი რუსეთში 2012 წელს მიიღეს და მას შემდეგ ქვეყანაში, ფაქტობრივად, გაქრა დამოუკიდებელი მედია და სამოქალაქო სექტორი. ისინი ჯერ „უცხოეთის აგენტებად“ გამოაცხადეს, შემდეგ კი საქმიანობაც აუკრძალეს.
კანონს საქართველოს დასავლური ინტეგრაციის შემაფერხებლად მიიჩნევენ საქართველოს დასავლელი პარტნიორები, მათ შორის, აშშ და ევროკავშირი.
საქართველოს ათასობით მოქალაქე უკვე რამდენიმე დღეა აპროტესტებს რუსული კანონპროექტის მიღებას. მშვიდობიანი აქციის წინააღმდეგ საქართველოს ხელისუფლებამ 7 მარტის აქციაზე წიწაკის სპრეი და წყლის ჭავლი გამოიყენა.
- დღეს საქართველოს დემოკრატიისთვის შავი დღეა — აშშ-ს საელჩო
- „ეწინააღმდეგება 12-პუნქტიან რეკომენდაციებს“ — ევროკავშირი „აგენტების“ კანონპროექტზე
- „ოცნების“ მხოლოდ 4-მა დეპუტატმა შეიკავა თავი რუსული კანონის მხარდაჭერისაგან
