დღეს, 17 თებერვალს, ბათუმში Wolt-ის 150-მდე კურიერი გაიფიცა. კურიერები ამბობენ, რომ გაფიცვა მანამდე გაგრძელდება, სანამ კომპანია მათ მოთხოვნებს არ დააკმაყოფილებს.
„ჩვენი მოთხოვნაა ტარიფების გაზრდა. ობიექტიდან მომხმარებლამდე არსებული მანძილის საბაზისო ამ წუთას არის 2.50 ლარი და გვინდა 3.50 ლარი გახდეს – კილომეტრაჟზე 20 თეთრი დაგვემატოს. ახლა 50 თეთრია და გვინდა გახდეს 70 თეთრი.
დღეს დამსაქმებელს ვესაუბრეთ ამ მოთხოვნებზე და ჯერჯერობით მივიღეთ პასუხი, რომ „სამომავლოდ კომპანია იზრუნებს ამის გამოსწორებაზე“. თუმცა არ დაუზუსტებიათ, ეს „სამომავლოდ“ რამდენ ხანში იქნება, ერთ თვეში, ორ თვეში თუ როდის. ამაზე არ აქვთ პასუხი“, – ამბობს თეიმურაზ გასვიანი.
ბათუმში 150-მდე კურიერი გაიფიცა
კურიერების თქმით, მათი შრომის უფლებები სათანადოდ არ არის დაცული კომპანიისგან.
„ჩვენ, წვიმაა თუ ქარი, ვმოძრაობთ ქალაქში და დამსაქმებელთან ამ დროს იმაზე გვიხდება საუბარი, რომ წვიმიან ამინდში მაინც აიყვანონ 3.50 [ლარზე] ტარიფი.
საწვავის ხარჯი ჩვენია, მოპედები ჩვენი ხარჯია. რაიმე ავარია თუ შეგვემთხვა გზაზე და კომპანიას დაურეკე რომ შეკვეთა სხვამ მიიტანოს, როგორ ხარო არც კი შეგეკითხებიან. დაზღვევაც კი არ გვაქვს ელემენტარული“, – გვეუბნება თეიმურაზ გასვიანი.
მისი თქმით, კურიერების გაფიცვა მანამდე გაგრძელდება, სანამ მათი მოთხოვნებს არ დააკმაყოფილებენ.
