„ეს არ არის კომპენსაცია, ეს არის კონფისკაცია. მოთხოვნა არ არის ვალიდური და კომპეტენტური”, – ასე დაასრულა თავისი საპაექრო სიტყვა ადვოკატმა ირაკლი ჯაფარიძემ. ის სასამართლოში ჩაქვში მცხოვრები ირაკლი ჯაყელიძის ინტერესებს იცავს, რომლის ქონებაზეც ექსპროპრიაციის უფლების მინიჭებას სასამართლოსგან საავტომობილო გზების დეპარტამენტი ითხოვს.
ირაკლი ჯაყელიძის სამსართულიანი სახლი ჩაქვში მდებარეობს. იქვე მას მეტალოპლასტმასის კარ-ფარჯრების საამქრო აქვს გახსნილი, თუმცა საწარმო გზების დეპარტამენტის მიერ აღწერილ დოკუმენტში ვერ მოხვდა.
„ვერ დაფიქსირდებოდა ეს საწარმო, რადგან მისი კანონიერების დამადასტურებელი რაიმე დოკუმენტი ვერ იქნა წარმოდგენილი”, – განმარტა სასამართლო სხდომაზე ლელა ლაზარიშვილმა, საავტომობილო გზების დეპარტამენტის წარმომადგენელმა.
ავტომაგისტრალის მშენებლობისთვის გზების დეპარტამენტი ექსპროპრიაციის უფლების [სახელმწიფოს მიერ საკუთრების იძულებითი ჩამორთმევა ან გასხვისება] მინიჭებას 293 კვ.მეტრ ფართობზე ითხოვდა, რომელზეც ირაკლი ჯაყელიძის სახლი დგას. ქონების სანაცვლოდ სახელმწიფო მოქალაქეს მხოლოდ 72 ათას ლარს სთავაზობს.
“ჩვენ გვესმის სახელმწიფო ინტერესი, მაგრამ ეს არ უნდა კეთდებოდეს პირადი საკუთრების ხელყოფის ხარჯზე. ჩვენ არ მოვითხოვთ უსაფუძვლო გამდიდრებას. უბრალოდ, ამ ადამიანმა უნდა მოახერხოს დარჩენილ მიწის ნაკვეთზე სახლის აშენება, ან ახლის ყიდვა”, – მიმართა მოსამართლეს ვაჟა ხახუტაიშვილმა, რომელიც ირაკლი ჯაყელიძის კიდევ ერთი ადვოკატია.
თავიანთ გამოსვლებში ადვოკატებმა ხაზი გაუსვეს კანონის მოთხოვნას ქონების დეტალური აღწერის შესახებ, რაც ექსპროპრიაციისთვის აუცილებელი პირობაა. „დეტალური აღწერის გარეშე როგორ შეიძლება დავადგინოთ საბაზრო ან რეალური ფასი? დოკუმენტებით ჩანს, რომ აუდიტი ადგილზე არც კი მისულა, მას ფოტომასალა თავად გზების დეპარტამენტმა წარუდგინა და ამის საფუძველზე შეფასდა ქონება“, – თქვა ადვოკატმა ირაკლი ჯაფარიძემ.
სახლი, რომელზეც ექსპროპრიაციის უფლება საავტომობილო გზების დეპარტამენტს სასამართლომ მიანიჭა
„ჩვენ გამოვიყენეთ ის მეთოდოლოგია, რასაც სხვა შემთხვევებშიც ვიყენებთ”, – განმარტა ლელა ლაზარიშვილმა, საავტომობილო გზების დეპარტამენტის წარმომადგენელმა.
“ვიდრე სამართლიან კომპენსაციაზე შეთანხმება არ მომხდარა, ექსპროპრიაციის უფლება მხარეს არ უნდა მიენიჭოს”, – მოითხოვა ადვოკატმა ვაჟა ხახუტაიშვილმა: “მოსარჩელემ თავის გამოსვლაში არაერთხელ გაუსვა ხაზი დაუყონებლივ აღსრულებას. მათ უნდათ ძალით დაათმობინონ მოქალაქეს კერძო საკუთრება. პირად საუბრებში გვეუბნებიან, თანხა თუ მიუღებელია თქვენთვის, ხელახლა მიმართეთ სასამართლოსო”.
დასკვნითი სიტყვების მოსმენის შემდეგ, მოსამართლე ლაშა თავართქილაძემ გადაწყვეტილების სარეზოლუციო ნაწილი გამოაცხადა. მოსამართლემ სარჩელი დააკმაყოფილა და საავტომობილო გზების დეპარტამენტს ირაკლი ჯაყელიძის ქონებაზე ექსპროპრიაციის უფლება მიანიჭა.
“ძირითადად, როგოც ვხვდები, სადავო მაინც კომპენსაციაა. ადმინისტრაციული წესით ამის განხილვა არ ხდება. ამ კუთხით დავა შესაძლებელია სამოქალაქო წესით. რაც შეეხება საწარმოს, ექსპროპრიაციის ფარგლებში მისი ჩამორთმევა არ ხდება და შესაძლებელია მისი გადატანა”, – განმარტა მოსამართლე ლაშა თავართქილაძემ სხდომის დახურვის შემდეგ.
ირაკლი ჯაყელიძის ადვოკატები საქმის ისევ ადმინისტრაციული წესით გასაჩივრებას აპირებენ: “მნიშვნელოვანია ქონების დეტალური აღწერა, რომ შესაძლებელი იყო მისი რაციონალურად შეფასება”, – უთხრა “ბათუმელებს” ადვოკატმა ირაკლი ჯაფარიძემ. ის იმედოვნებს, რომ გზების დეპარტამენტი წინა ხელისუფლების პრაქტიკას არ გამოიყენებს და ხვალვე ჯაყელიძის სახლთან ბულდოზერები არ გამოჩნდებიან:
“თუ სახელმწიფო ამოვა იმ პრინციპიდან, რომ საკუთრების უფლება არის შეუვალი და საყოველთაოდ აღიარებული, ამ შემთხვევაში, გზების დეპარტამენტმა ისევ უნდა დაელაპარაკოს მხარეს კომპენსაციის შესახებ და თუკი თანხმობას ვერ მიაღწევს, მაშინ თავად მიმართოს სასამართლოს სამოქალაქო წესით”.
ვიდრე მოსმართლე გადაწყვეტილების მისაღებად სათათბირო ოთახში იმყოფებოდა, ირაკლი ჯაყელიძე გზების დეპარტამენტის წარმომადგენელს ესაუბრა
