ნეტგაზეთი • RU

კვირიკეში, სადაც წყალი არ აქვთ, ქობულეთისთვის წყლის კიდევ 1 რეზერვუარს ააშენებენ

ქობულეთის მუნიციპალიტეტმა ქალაქ ქობულეთის წყალმომარაგების ქსელის საპროექტო დოკუმენტაციის შედგენაზე ტენდერი გამოაცხადა. ერთ-ერთი პირობით, ქალაქის წყალმომარაგებისთვის სოფელ კვირიკეში უნდა მოეწყოს დამატებით 5000 ტონიანი რეზერვუარი.

კვირიკეში, სადაც წლებია მოსახლეობას უწყლობა აწუხებს, ერთი ასეთი რეზერვუარი უკვე არის, საიდანაც ქალაქი ქობულეთი წყლით მარაგდება. როგორც „ბათუმელებმა“ გაარკვია, ეს ერთი რეზერვუარი ამ დროისთვის ქალაქის წყალმომარაგებისთვის საკმარისია, „თუმცა, ქალაქი იზრდება და დამატებით რეზერვუარის აშენება პრიორიტეტულია“.

რეზერვუარი, რომელიც სოფელ კვირიკეშია, წყლით სხვადასხვა ადგილებზე განთავსებული ჭაბურღილებით ივსება, სპეციალურად მუშავდება და აქედან მიეწოდება სასმელი წყალი ქალაქ ქობულეთს [კვირიკეს მოსახლეობა ამბობს, რომ მათ სოფლის ამ რეზერვუარზე დაერთებაც მოითხოვეს, მაგრამ უარი უთხრეს. მოსახლეობა დამატებით ჭაბურღილების მოწყობასაც ითხოვს].

ამ ეტაპზე მუნიციპალიტეტი ქალაქ ქობულეთის წყალმომარაგების ქსელის საპროექტო-სახარჯთაღრიცხვო დოკუმენტაციას შეისყიდის, რისთვისაც 140 ათასი ლარია გამოყოფილი. ამ თანხას ქობულეთი აჭარის ბიუჯეტიდან მიიღებს.

ტენდერში გამარჯვებულს სხვადასხვა სამუშაოების ჩატარება მოუწევს, მათ შორის:

გეოლოგიური კვლევები, ტოპოგეოდეზიური სამუშაოები და სიტუაციურ გეგმაზე ნიშნულების დატანა; სიტუაციური გეგმა სათანადო დეტალიზაციით; არსებული მიწისქვეშა კომუნიკაციების მდგომარეობის შესწავლა, დატანა სიტუაციურ გეგმაზე და შეთანხმება მესაკუთრეებთან… წყლის მომარაგების გადასაჭრელი ღონისძიებების განსაზღვრა მუნიციპალური შპს „ქობულეთის წყალთან“ და მერიასთან შეთანხმებით.

 

დაგეგმილი და დასაპროექტებელი სამუშაოების ვრცლად სანახავად დააწკაპუნეთ აქ
  • სათავე ნაგებობაზე არსებულ ტერიტორიაზე ჩატარდეს ჰიდრო-გეოლოგიური კვლევა, რათა დადგინდეს წყლის დებეტი.
  • მოეწყოს წყლის შემკრები აუზი, მინიმუმ 1000 მ³ მოცულობის, (საჭიროების შემთხვევაში საპროექტო ორგანიზაციის მიერ განისაზღვროს შემკრები აუზის მოცულობა).
  • მოეწყოს სატუმბი სადგური 3 ტუმბოთი საჭირო წარმადობის (2 ტუმბო სარეზერვოდ).
  • დამატებით მინიმუმ 12 ჭაბურღილის მოწყობა (საჭიროების შემთხვევაში საპროექტო ორგანიზაციის მიერ განისაზღვროს ტუმბოების დამატებითი რაოდენობა) თავისი ტუმბოებით, მკვებავი ხაზებით და ელ. სისტემაზე დაერთებით, აგრეთვე თავისი შემკრები მაგისტრალით შემკრებ ავზამდე.
  • მოეწყოს ახალი საქლორატორო მოპოვებული წყლის რაოდენობიდან გამომდინარე სიმძლავრის.
  • დამატებით არანაკლებ 600 მმ-იანი ხაზის გაყვანა, შემკრები ავზიდან რეზერვუარამდე, (საჭიროების შემთხვევაში საპროექტო ორგანიზაციის მიერ განისაზღვროს წყალსადენის მილის პარამეტრები).
  • დამატებით 5000 მ³-იანი რეზერვუარის მოწყობა სოფელ კვირიკეში.
  • მშენებლობის ორგანიზაციის პროექტი ( სამუშაოთა შესრულების ტექნოლოგიური სქემები), კალენდარული გრაფიკი;
  • მიმწოდებელმა, საპროექტო-სახარჯთაღრიცხვო დოკუმენტაციის ექსპერტიზა უნდა განახორციელოს სსიპ ,,ლევან სამხარაულის სახელობის ექსპერტიზის ეროვნული ბიუროს” ან სხვა აკრედიტებული პირის მიერ.

 

აღნიშნული პროექტისა და ხარჯთაღრიცხვის დოკუმენტების შესყიდვაზე ტენდერში წინადადებების მიღება 2022 წლის 30 ნოემბერს დაიწყება და 2 დეკემბერს დასრულდება. საპროექტო-სახარჯთაღრიცხვო დოკუმენტაცია მიმწოდებელმა ქობულეთის მერიას ხელშეკრულების დადებიდან 120 დღის ვადაში უნდა წარუდგინოს.

მერიაში „ბათუმელებს“ უთხრეს, რომ პროექტის შეძენის შემდეგ „მისი დროულად განხორციელების საკითხებზე უკვე მუშაობენ“.

ქობულეთის რამდენიმე სოფელს წლებია წყალი შეზღუდვით მიეწოდება, განსაკუთრებით რთული სიტუაცია რომ სოფელ ქვედა კვირიკეში იყო, ამის შესახებ „ბათუმელები“ სამი წლის წინ წერდა:

მაშინ ქობულეთის მერიაში განაცხადეს, რომ „სამი სოფლისთვის – სამება, კვირიკე და ბობოყვათი – ჭაბურღილების მოწყობის პროექტი უკვე შეძენილი იყო“. თუმცა, სახელმწიფო შესყიდვების პორტალს თუ გადავხედავთ, სოფლებში ჭაბურღილების მოწყობაზე პროექტებს ახლა ყიდულობს.

მაგალითად, სოფელ ქვედა კვირიკეში ჰიდროლოგიური დასკვნის საფუძველზე ორი ჭაბურღილის მოწყობის დოკუმენტაციის მომზადებაზე, ჭაბურღილებიდან რეზერვუარში ამავალი წყალსადენი მაგისტრალების, ასევე წყალსადენი ქსელის მოწყობასა და წყალშემკრებ რეზერვუარზე დაერთების პროექტზე ტენდერი მუნიციპალიტეტმა 2022 წლის 16 ნოემბერს გამოაცხადა, თუმცა ეს ტენდერი არ შედგა.

ეს ტენდერი 14 300 ლარით იყო გამოცხადებული და ამ თანხით ქვედა კვირიკეს გარდა პროექტი სოფელ ლეღვას წყალმომარაგებისთვისაც უნდა მომზადებულიყო.

 

სოფლებში ჭაბურღილების მოწყობის პროექტებზე შემდგარი ტენდერების სანახავად დააწკაპუნეთ აქ

ქობულეთის მუნიციპალიტეტში ჭაბურღილებისა და გამანაწილებლის მოწყობის საპროექტო-სახარჯთაღრიცხვო დოკუმენტაციის შედგენაზე ხელშეკრულება 28 107 ლარზეა გაფორმებული ინდმეწარმე ზურაბ ნაცვლიშვილთან. ამ ხელშეკრულების ფარგლებში უნდა მომზადდეს პროექტი, რომლითაც შემდეგი სამუშაოები უნდა შესრულდეს:

  • სოფელი კვირიკე (მუხნარის მიმართულება)-2 ერთეული ჭაბურღილის მოწყობა;
  • სოფელი ლეღვა (დამწვარი გორა) – 2 ერთეული ჭაბურღილის მოწყობა და არსებული ზედაპირული ტუმბოს ძრავით დამატება;
  • სოფელი წყავროკა – 2 ერთეული ჭაბურღილის მოწყობა;
  • სოფელი მუხაესტატე (კონცხა)- 2 ერთეული ჭაბურღილის მოწყობა რეზერვუარით;
  • სოფელი ალამბარი -2 ერთეული ჭაბურღილის მოწყობა;
  • სოფელი გვარა (შაინიძეების მიმართულება)- 2 ერთეული ჭაბურღილის მოწყობა რეზერვუარით;
  • სოფელი გვარა (ცენტრი) – 2 ერთეული ჭაბურღილის მოწყობა რეზერვუარით;
  • სოფელი ხუცუბანი (ცენტის მიმართულება)-2 ერთეული ჭაბურღილის მოწყობა, არსებული ჭაბურღილის მილის გასწორება და ახალი მაგისტრალის
    დამატება;
  • სოფელი ზედა ხუცუბანი – გამანაწილებლის მოწყობა.

ქობულეთის მერიამ, მიმდინარე წლის ივლისში შპს „წყალმშენი 2013“-თან 14 441 ლარზე გააფორმა ასევე ხელშეკრულება შემდეგი სამუშაოების დაპროექტებაზე:

  • სოფელი კვირიკე (მუხნარის მიმართულება)-წყლის შემკრები (კაპტაჟი);
  • სოფელი ბობოყვათი (ვერულიძე-ხინიკაძე-ვარშანიძეების მიმართულება)-რეზერვუარი;
  • სოფელი ბობოყვათი (კონცელიძე-მემიაძე-კირჩხელების მიმართულება)-სალექარი;
  • სოფელი ქობულეთი (კოხი)- რეზერვუარი და შემკრები კაპტაჟი;
  • სოფელი დაგვა (ლაზისტანი)-რეზერვუარი;
  • სოფელი დაგვა- დაზიანებული მე-5 უბნის ცენტრალური აუზი და სალექარი;
  • სოფელი ციხისძირი-სასმელი წყლის სათავე ნაგებობის რეზერვუარი;
  • სოფელი ლეღვა(ქარცივაძეების მიმართულება)-რეზერვუარი;
  • სოფელი ზენითი- წყლის შემკრები (კაპტაჟი) (ტერიტორიულად მდებარეობს სოფელ ჭახათში);
  • სოფელი ქაქუთი-წყლის შემკრები (კაპტაჟი).

 

ქობულეთის მუნიციპალიტეტში მოსახლეობის სასმელი წყლით მომარაგებაზე ორი მუნიციპალური ორგანიზაცია მუშაობს. ქალაქს შპს „ქობულეთის წყალი“ ემსახურება, სოფლებს კი – ა(ა)იპ „ქობულეთის სოფლის წყალი“.

კვირიკეში მოსახლეობის გარკვეულ ნაწილს უწყლობის პრობლემა განსაკუთრებით ზაფხულის პერიოდში აწუხებს.

2018 წელს ქობულეთის მერიაში აცხადებდნენ, რომ სოფლებში ჭაბურღილების მოწყობას აღარ აპირებდნენ და მაშინ ტენდერი, რომელიც ხუთ სოფელში – ქვედა აჭყვაში, ბობოყვათში, კვირიკეში, სამებასა და მუხაესტატეში ჭაბურღილების მოწყობის პროექტების მომზადებას ითვალისწინებდა, შეწყვიტეს.

„აჭარის სოფლებში წყლისა და კანალიზაციის სისტემის მოსაწყობად შესაბამის პროექტს ახორციელებს „აჭარის წყლის ალიანსი“ და სახელმწიფო სახსრები რაციონალურად რომ დაიხარჯოს, ტენდერი უნდა შეწყდეს“, – აღნიშნული იყო მაშინ ტენდერის შეწყვეტის ოქმში.

აჭარის სოფლებში წყლისა და კანალიზაციის პროექტის განხორციელება კი, რომლისთვისაც 53 მილიონი ევროა საჭირო, დროში გაიწელა.

თუმცა, დროულადაც რომ დაწყებულიყო, საწყის ეტაპზე, ამ პროექტის ფარგლებში ქობულეთში მხოლოდ 5 სოფლის წყალმომარაგების სისტემის აშენება იგეგმება: ცეცხლაური, ოჩხამური, ჯიხანჯური, მუხაესტატეს მეურნეობის დასახლება და ქვედა კვირიკე.

ამ პროექტის ფარგლებში ამჯერად, აჭარის რამდენიმე დაბაში გამწმენდი ნაგებობების პროექტების გარემოს ეროვნულ სააგენტოსთან შეთანხმების პროცედურები მიმდინარეობს.

ამ თემაზე ვრცლად:

ხულოში, შუახევსა და ოჩხამურში ხელოვნურ ჭაობებს ააშენებენ საკანალიზაციო წყლების გასაწმენდად

მთავარი ფოტო: „ბათუმელების“ არქივიდან
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com