რუსეთის თითქმის ერთკვირიანი სარაკეტო და საავიაციო შეტევების შედეგად, ვოლოდიმირ ზელენსკის ინფორმაციით, უკრაინის ელექტროსადგურების მესამედი უკვე განადგურდა.
„რუსეთის ტერორისტული თავდასხმების კიდევ ერთი სახეობა: მიმართულია ენერგო და კრიტიკულ ინფრასტრუქტურაზე. 10 ოქტომბრის შემდეგ უკრაინის ელექტროსადგურების 30% განადგურდა, რის გამოც მთელ ქვეყანაში ელექტროენერგიის მასობრივი გამორთვებია“, – წერს უკრაინის პრეზიდენტი ვოლოდიმირ ზელენსკი ტვიტერზე და დასძენს, რომ პუტინის რეჟიმთან მოლაპარაკებებისთვის უბრალოდ „სივრცე აღარ რჩება“.
Another kind of Russian terrorist attacks: targeting 🇺🇦 energy & critical infrastructure. Since Oct 10, 30% of Ukraine’s power stations have been destroyed, causing massive blackouts across the country. No space left for negotiations with Putin’s regime. @United24media pic.twitter.com/LN4A2GYgCK
— Володимир Зеленський (@ZelenskyyUa) October 18, 2022
დღესვე უკრაინის პრეზიდენტის ოფისში განაცხადეს, რომ თუ რუსეთი ენერგოობიექტებზე დარტყმას გააგრძელებს, უკრაინის რაიონებში შესაძლოა ელექტროენერგიის რეგულარული გამორთვები დაიწყოს.
„უახლოეს მომავალში მძიმე დროება გველოდება, ამიტომაც ყველაფრისთვის უნდა მოვემზადოთ. პირველ რიგში, ელექტროენერგიის ეკონომიისთვის – შესაძლებელია, დაიწყოს ელექტროენერგიის მონაცვლეობით გამორთვა. ჩვენ გვესმის, რომ რუსებს ასეთი მიზანი აქვთ – დააშინონ მოსახლეობა, დატოვონ ენერგომომარაგების, წყლისა და გათბობის გარეშე, ამიტომაც ყველა უნდა მოვემზადოთ მძიმე ზამთრისთვის“, – განაცხადეს ზელენსკის ოფისში.
უკრაინული მედიის ცნობით, 18 ოქტომბრის დილას რუსეთმა სერიოზული დარტყმა მიაყენა დნეპრის ენერგოსისტემას. დაზიანდა ენერგოინფრასტრუქტურა კიევსა და ჟიტომირში. აფეთქებები იყო ხარკოვსა და კრივოი როგშიც.
რუსეთმა სარაკეტო და საავიაციო შეტევა კიევსა და უკრაინის სხვა ქალაქებზე 10 ოქტომბერს დაიწყო. მას შემდეგ რამდენჯერმე დაიბომბა უკრაინის ენერგოინფრასტრუქტურა და სამოქალაქო ობიექტები.
ერთ-ერთი მასშტაბური თავდასხმა 17 ოქტომბერს მოხდა. უკრაინის ხელისუფლებისა და მედიის ცნობით, რუსეთის არმიამ „შაჰედებით“ დაბომბა კიევი და კიდევ რამდენიმე ქალაქი. დედაქალაქში ერთი რაკეტა საცხოვრებელ კორპუსს მოხვდა. დღეს განახლებული ინფორმაციით, დაღუპულია 5 ადამიანი.
უკრაინის ქალაქების ინტენსიური დაბომბვის ფონზე პოლონეთში ლტოლვილთა ახალ ნაკადს ელოდებიან. პოლონეთის ხელისუფლების ვარაუდით, ზამთრის მოახლოებასთან ერთად მათ ქვეყანაში შესაძლოა თავშესაფარი დაახლოებით 800 ათასმა უკრაინელმა ეძებოს.
