„ვაპირებ, ამაღამ ხულოს მერიასთან დავრჩე, ვიდრე გზას არ გამიკეთებენ,“ – ამბობს შადიმან ხოზრევანიძე. ის სოფელ კვატიაში ცხოვრობს და მის სახლთან მისასვლელი გზის გამაგრებას ითხოვს, რომელიც გეოლოგიური დასკვნის მიხედვით, „საფრთხეს ქმნის“.
შადიმან ხოზრევანიძემ 2022 წლის მარტში აჭარის მთავრობის ადმინისტრაციის შენობის წინ ღამე გაათია სამედიცინო კვლევების დაფინანსების მოთხოვნით. მოქალაქის თქმით, მისი მოთხოვნები დღემდე არ შესრულებულა.
ამჯერად მოქალაქე შიდასასოფლო გზაზე ფერდსამაგრის მოწყობას ითხოვს, რისი აუცილებლობაც გეოლოგებმა დაინახეს და დასკვნაში დაწერეს. გზის გამაგრების წინააღმდეგი მეზობელია, ვისთანაც შადიმან ხოზრევანიძეს სამეზობლო დავა აქვს და ვისი მიწის ნაკვეთიც საჭიროა ფერდსამაგრის მოსაწყობად.
„მისასვლელი გზის ქვედა მხარეს უხვი ატმოსფერული ნალექის მოსვლის დროს პერიოდულად ვითარდება ლოკალური მეწყრული ჩაქცევები და საფრთხეს უქმნის გზის მდგრადობას. აუცილებელია საცხოვრებელ სახლთან მისასვლელი დაზიანებული გზის მონაკვეთის ქვედა მხარეს, მთელ პერიმეტრზე, სათანადო საპროექტო დოკუმენტაციის შედგენის შემდეგ განხორციელდეს ფერდსამაგრი სამუშაოები,“ – წერია გეოლოგების დასკვნაში, რომელიც მოქალაქე შადიმან ხოზრევანიძემ გაგვაცნო.
„ეს დასკვნა 2021 წელს გაიცა, თითქმის წელიწადი გავიდა და არაფერი შეცვლილა.
მერია მეუბნება, რომ სხვისი მიწის ნაკვეთზე ვერ მოაწყობს ფერდსამაგრს, სასამართლოს მიმართეო, სასამართლოს მიმართვას წლები სჭირდება, გზა კი, ყოველდღეა საჭირო. პრობლემა მაქვს სახლის საძირკველზეც, რაც ასევე წერია გეოლოგების დასკვნაში, საძირკვლის გასამაგრებლად თანხა გამომიყვეს – 15 ათასი ლარი და ხელით ვეზიდებით საჭირო ნივთებს, სახლის საძირკველი რომ გავამყარო. წლებია ეს გზა პრობლემაა, მაგრამ თანდათან უფრო სახიფათო გახდა,“ – გვითხრა შადიმან ხოზრევანიძემ.
„ეს კერძო სამეზობლო დავაა, რაშიც ჩვენ ვერ ჩავერევით,“ – ამბობს ხულოს მერის მოადგილე ნადიმ ვასაძე. მისი თქმით, მერია ფერდსამაგრს ვერ მოაწყობს, ვიდრე „მეზობლები ვერ შეთანხმდებიან“.
„მე როგორ მოვარიგო მეზობლები. ეს გზა მობეტონდება და ეს გაკეთდება, ფერდსამაგრის მოწყობისთვის კი, მეზობლის თანხმობაა საჭირო. თუ ვერ თანხმდებიან, სასამართლოს უნდა მიმართოს,“ – გვიპასუხა ხულოს მერის მოადგილემ, ნადიმ ვასაძემ.
გზის ის მონაკვეთი, სადაც გადაადგილება საფრთხეს წარმოადგენს და ფერდსამაგრი უნდა მოეწყოს, 15 მეტრია.
