ნეტგაზეთი • RU
kardakari

როგორ შეცვალა 57 წლის ქალმა ქედის ერთ სოფელში თანასოფლელების ცხოვრება

ქედის მუნიციპალიტეტის სოფელ ჯალაბაშვილებში მცხოვრები ციური კეკელიძე ერთ-ერთი მათგანია, რომელმაც „მონაწილეობითი ბიუჯეტის“ შესახებ ინფორმაცია კარდაკარ კამპანიით მიიღო და გადაწყვიტა მეზობლებთან ერთად სოფელში სკვერი მოეწყო.

„სოფელში მცხოვრები ბავშვებისთვის გართობის ერთადერთი საშუალება ინტერნეტი და მობილური თამაშებია. იქიდან გამომდინარე, რომ სოფელში არაა გართობის საშუალება, გადავწყვიტეთ „მონაწილეობითი ბიუჯეტის“ პროგრამით შეგვექმნა ბავშვებისთვის და არა მარტო მათთვის, სივრცე სადაც ისინი თამაშს, გართობას და ერთმანეთთან უკეთეს კომუნიკაციას შეძლებდნენ. პროექტი სკვერის მოწყობაზე დავწერე, რომელიც ითვალისწინებს, როგორც სათამაშო და გასართობი ატრაქციონების მოწყობას, ასევე სოფელში მცხოვრები ადგილობრივებისთვის მოსასვენებელ, რეკრეაციულ სივრცეს“.

ციური კეკელიძე

ციური კეკელიძე

57 წლის ციური კეკელიძეს 2 შვილი და ერთი შვილიშვილი ჰყავს და იმედოვნებს, რომ გასართობ – შემეცნებითი სივრცე ახალ თაობას მნიშვნელოვნად წაადგება.

ციური კეკელიძის თქმით, რეკრეაციულ სივრცეში განთავსდება ძელსკამები და ფანჩატური, სადაც ადგილობრივები თავშეყრას შეძლებენ.

პროექტის განხორციელებისთვის ქედის მერიის ბიუჯეტიდან 24 100 ლარია გათვალისწინებული, სწორედ ამდენივე თანხა იყო გამოყოფილი სოფლისთვის. პროექტის ავტორი ამბობს, რომ სკვერი სოფლის ცენტრში განთავსდება.

„ სოფლის ცენტრში, შემოსასვლელი ადგილი ამჟამად ძალიან მოუწესრიგებელია. შემოსული სტუმრისთვისაც სივრცე არაესთეტიკურია. ამ პროექტით კი ტერიტორია სტუმრისა  თუ ტურისტისთვის გაცილებით მიმზიდველი გახდება“.

ციური კეკელიძის იდეამ არჩევნებზე 69 ხმა მიიღო და გაიმარჯვა. დიასახლისი ამბობს, რომ პროექტის განხორციელებას ადგილობრივები მხარს უჭერდნენ და საინფორმაციო კამპანია არ გასჭირვებია. მისი იდეის გარდა, კიდევ ოთხი იდეა იყო რეგისტრირებული. კონკურენტი პროექტები ითვალისწინებდა პრობლემურ მონაკვეთებზე მზა ბეტონის დაგებას, ფანჩატურის მშენებლობას, wifi მოდემის შეძენასა და მინისტადიონის მოწყობას.

„ძალიან მიხარია რომ ასეთი სოფლისთვის სასარგებლო პროექტი განხორციელდება სოფელში. „მონაწილეობითი ბიუჯეტი“ საშუალებას გვაძლევს, ჩვენ ადგილობრივებმა, ხმათა უმრავლესობით და  დემოკრატიულად გადავწყვიტოთ ჩვენს სოფელში განსახორციელებელი პროექტები. ეს მეტ სტიმულს გვაძლევს ადგილობრივებს, რომ ვაკეთოთ საზოგადოებისათვის საჭირო საქმეები და ჩვენ თვითონ ვხარჯოთ ჩვენი ბიუჯეტი. როგორც ვიცი პროექტის განხორციელებამდე ჯერ პროექტი უნდა შედგეს და ამისთვის ტენდერი ცხადდება. ვაპირებ, რომ დაგეგმვის და განხორციელების პროცესში ჩავერთო. მინდა ზუსტად ისეთი პროექტი გაკეთდეს, როგორიც ჩვენ, ადგილობრივებს გვსურს“.

მონაწილეობითი ბიუჯეტით, მუნიციპალიტეტის მასშტაბით, 222 იდეა დარეგისტრირდა, მათგან არჩევნების ეტაპზე 205 იდეა გადავიდა. კენჭის ყრის შედეგად, რომელშიც 5000 მდე მოქალაქე მონაწილეობდა, 72 პროექტი დაფინანსდა.

სოფელ ჯალაბაშვილები

სოფელ ჯალაბაშვილები

„გამარჯვებულ პროექტებს შორისაა გარეგანათების მოწყობა, ბეტონის შეძენა, წისქვილების, სოფლის სახლებისა და ბილიკების რეაბილიტაცია, მოსაცდელების მშენებლობა, თხილის სარჩევი და სხვადასხვა სამეურნეო დანადგარების შეძენა. პროექტების ჯამური ღირებულება 1 427 400 ლარია. გარეგანათებებისა და ბეტონის საფარის მოწყობისთვის ტენდერები უკვე გამოვაცხადეთ. დანარჩენზე კი საპროექტო დოკუმენტაცია მზადდება. როგორც კი პროექტები გვექნება მოხდება აღნიშნული სამუშაოების დაწყებაც. ვფიქრობ, რომ მონაწილეობითი ბიუჯეტის სამუშაოებს ნოემბრის დასაწყისშივე დავასრულებთ“, – ამბობს ქედის მერი, როლანდ ბერიძე.

„მონაწილეობითი ბიუჯეტით შესაძლებელია ისეთი პროექტები დაფინანსდეს, რომელიც სხვა პროგრამებით ვერ ფინანსდება, მაგალითად ასეთია სოფლისთვის ბილიარდისა და მაგიდის ჩოგბურთის მაგიდების შეძენა. ასევე თხილის სარჩევი და თამბაქოს საჭრელი დანადგარის შეძენა. მონაწილეობითი ბიუჯეტის ფარგლებში აქტივობა საკმაოდ მაღალი იყო პირველივე წელს, ამიტომაც მოსახლეობის მაღალი ინტერესი საშუალებას გვაძლევს პროგრამის ბიუჯეტი გავზარდოთ და თანხას მომავალი წლისთვისაც დავამატებთ“.

ნეტგაზეთის მასალების სხვა გამოცემებში გადაბეჭდვის წესი
ავტორი