წელს „შუამთობის“ დღესასწაული ბეშუმსა და ჩირუხის მთაზე 6-7 აგვისტოს გაიმართება. ღონისძიებებისთვის 155 900 ლარი დაიხარჯება აჭარის განათლებისა და კულტურის სამინისტროს ბიუჯეტიდან.
შესყიდვის დოკუმენტის მიხედვით, ჩირუხსა და ბეშუმში გასამართი ღონისძიებები თითქმის იდენტურია. აღნიშნული თანხა დაიხარჯება ღონისძიებების მოწყობაში. უნდა მოეწყოს სცენა, დამონტაჟდეს მონიტორი და ა.შ. ასევე, სცენის წინ უნდა მოეწყოს დასაჯდომი სივრცე, რისთვისაც ბიუჯეტიდან 25 000 ლარია გათვალისწინებული.
ამავე თანხაში შედის ჯიხურების გადახურვა, კვების კუთხის მოწყობა, დეკორაციები, ქორწინების კუთხე, საბავშვო ატრაქციები, მაისურები სპორტულ ღონისძიებაში მონაწილეებისთვის და „დელიკების“ დაქირავება.
ღონისძიებაზე პანტომიმა/ანიმატორებისთვის 12 500 ლარი დაიხარჯება ბიუჯეტიდან.
„შუამთობის“ დღესასწაულზე ადგილობრივი შემსრულებლების გარდა თბილისელი მომღერლებიც მიიღებენ მონაწილეობას.
კონცერტზე იმღერებენ: თემურ თათარაშვილი, ანსამბლი „ფორტე“, მაკა ზამბახიძე, რუსა მორჩილაძე, თიკა ფაცაცია, ნინი ბადურაშვილი, ვერიკო ტურაშვილი, მანანა თოდაძე, ნუგზარ ერგემლიძე და ჯგუფი „ბანი“. ამ მომღერლების ჰონორარისთვის ჯამში 75 000 ლარია გათვალისწინებული ბიუჯეტში.
ბეშუმში „შუამთობას“ უხუცესთა ანსამბლი „ბერმუხა“ გახსნის.
პანდემიის გამო ბოლო ორი წელი „შუამთობის“ დღესასწაული არ გამართულა.
______________
ფოტო „ბათუმელების“ არქივიდან.
