„ერთიანი ნაციონალური მოძრაობა“ საკრებულოში ფრაქციას შექმნის, ამასთან დაკავშირებით პარტიამ განაცხადი დღეს დაარეგისტრირა. ფრაქციის თავმჯდომარე ლაშა კილაბერია იქნება, მოადგილეების თანამდებობებზე კი ნაზი ფუტკარაძე, ბაჩი მექვაბიშვილი და ნოდარ დუმბაძე წარადგინეს.
ენმ-ის პარტიის ფრაქციის თავმჯდომარეს ოთხი მოადგილე ეყოლება: „შევჯერდებით, ვინ იქნება მეოთხე.“ – გვითხრა ლაშა კილაბერიამ.
ფრაქციის რეგისტრაციის შესახებ განაცხადი საკრებულომ ცნობად მიიღო.
საკრებულოში ფრაქცია უკვე აქვს „ქართულ ოცნებას“. ამ ფრაქციას საკრებულოს წევრი თენგიზ აფახაზავა ხელმძღვანელობს, მას ხუთი მოადგილე ჰყავს.
ფრაქციის თავმჯდომარის ანაზღაურება 2900 ლარია, ფრაქციის თავმჯდომარის მოადგილის ხელფასი კი 2000 ლარით განსაზღვრეს. ფრაქციას ეკუთვნის სახელმწიფო ავტომანქანა, მძღოლის მომსახურება, საწვავი, სატელეფონო და სხვა წარმომადგენლობითი ხარჯი.
დღეს, 30 მაისს, საკრებულოს კომისიების თავმჯდომარეებიც აირჩიეს: იურიდიულ და საპროცედურო საკითხთა კომისიის თავმჯდომარის თანამდებობა დავით მახარაძეს ჩააბარეს, ჯანმრთელობისა და სოციალურ საკითხთა კომისიის თავმჯდომარის პოსტი ნერიმან ცინცაძემ დაიკავა, განათლების, კულტურის, ტურიზმისა და სპორტის საკითხთა კომისიის თავმჯდომარე ლევან ცხოიძე გახდა.
საკრებულოს ინფრასტრუქტურის განვითარების კომისიის თავმჯდომარის პოსტი მინდია გოგუაძემ დაიკავა. ბათუმის საკრებულოს გადაწყვეტილებით, საკრებულოს საფინანსო და ეკონომიკური კომისიის თავმჯდომარე გოჩა მგელაძე გახდა.
