საქართველოს სტატისტიკის ეროვნული სამსახურის წინასწარი მონაცემებით, 2022 წლის მარტში, წინა თვესთან შედარებით, შემცირებულია როგორც იმპორტი რუსეთიდან, ასევე ექსპორტი.
საქსტატის მონაცემებით, რუსეთიდან მარტის თვეში საქართველოში შემოტანილია 91,5 მილიონი აშშ დოლარის საქონელი, ხოლო თებერვლის თვეში შემოტანილი იყო 95,9 მილიონი დოლარის საქონელი.
ამავე მონაცემებით, იმპორტი რუსეთიდან მარტის თვეში გაზრდილია იანვართან შედარებით. მიმდინარე წლის იანვარში რუსეთიდან შემოტანილი იყო 85,9 მილიონი აშშ დოლარის საქონელი.
რაც შეეხება ექსპორტს, საქართველოდან რუსეთში მარტის თვეში გატანილია გაცილებით ნაკლები ღირებულების საქონელი, ვიდრე თებერვალში და ასევე, იანვარში.
მარტში რუსეთში გატანილი იყო 16,9 მილიონი აშშ დოლარის პროდუქცია, ხოლო თებერვალსა და იანვარში, შესაბამისად, 50,1 მილიონი და 42,6 მილიონი აშშ დოლარის ღირებულების საქონელი.
2022 წლის იანვარ-მარტში, მთლიანობაში, საქართველოში რუსეთიდან შემოტანილია 273,4 მილიონი აშშ დოლარის საქონელი, ხოლო გატანილია 109,8 მილიონი აშშ დოლარის.
საქართველოში ყველაზე მეტი პროდუქცია 2022 წლის სამ თვეში, ქვეყნების მიხედვით, შემოტანილია თურქეთიდან – 463,1 მილიონი აშშ დოლარის, ხოლო ამავე პერიოდში საქართველოდან ყველაზე მეტი პროდუქცია გატანილია ჩინეთში – 220 მილიონი აშშ დოლარის.
ამავე თემაზე:
მთავრობამ 13 მილიონად ნაყიდი ზეთი და შაქარი 12 მილიონად გაყიდა/გასცა
