საქართველოს განათლების მინისტრმა, მიხეილ ჩხენკელმა, გამოსცა ახალი ბრძანება, რომელიც საქართველოს ისტორიის ცალკე საგნად გამოყოფას ითვალისწინებს მე-10 და მე-12 კლასებში.
ბათუმის მე-15 საჯარო სკოლის დირექტორის, ნინო მოდებაძის განმარტებით, „დღევანდელი მდგომარეობით, საგანი ისტორია ისწავლება მე-7 კლასიდან მე-12 ჩათვლით, ოღონდ საქართველო და მსოფლიო ისტორია ერთად“.
მოდებაძის თქმით, მეცხრე კლასის სახელმძღვანელოები ახალია, თუმცა მასაც „საქართველო და მსოფლიო ისტორია“ აწერია.
„თუ ცალკე საგნად გამოიყოფა ეს ძალიან კარგი იქნება – ადრეც გვინდოდა, რომ ქვეყნის ისტორია ბავშვებს უფრო ღრმად ესწავლათ. მე-12 კლასში სულ 8 საგანს სწავლობენ და ერთიც რომ დაემატოს, არა მგონია, ამან გამოიწვის დიდი საათობრივი დატვირთვა“, – გვითხრა ნინო მოდებაძემ.
საქართველოს ისტორიის ცალკე საგნად გამოყოფა, სავარაუდოდ, გაზრდის საათებს სკოლაში. „არ ვიცი, ამას რის ხარჯზე გააკეთებენ, შეიძლება რომელიმე საგნობრივი საათი შეამცირონ ან ინტეგრირება მოახდინონ, ზუსტად ვერ გეტყვით როგორ იქნება. ჯერ არ გვაქვს მითითებები“, – ამბობს ნინო მოდებაძე.
ბრძანების მიხედვით:
„მე და საზოგადოება“ ისწავლება III-IV კლასებში
„ჩვენი საქართველო“ – V-VI კლასებში
ისტორია მოიცავს საგანს „ისტორია“ – ისწავლება VII-XII კლასებში
საგანი „საქართველოს ისტორია“ ისწავლება X-XII კლასებში.
გეოგრაფია მოიცავს საქართველოსა და მსოფლიო გეოგრაფიას და ისწავლება VII-XII კლასებში.
