განათლების სამინისტროს ინფორმაციით, ქართული ენის მომზადების საგანმანათლებლო პროგრამაზე 1+4 ჩარიცხული სტუდენტებისთვის სასწავლო გრანტის დაფინანსება გაორმაგდა.
სომხურენოვანი და აზერბაიჯანულენოვანი 100-100 სტუდენტის ნაცვლად, 2024-2025 სასწავლო წლებში 200-200 სტუდენტი დაფინანსდება.
სამინისტროს ინფორმაციით, აზერბაიჯანული და სომხურენოვანი ტესტების საფუძველზე ჩარიცხულ სტუდენტთა სახელმწიფო გრანტი 450 000 ლარია. „დაფინანსების მოცულობა ყოველწლიურად გაიზრდება“, – ამბობს სამინისტრო.
ამავე წყაროს ცნობით, ეთნიკური უმცირესობის წარმომადგენელ სტუდენტებს, „1+4“ საგანმანათლებლო პროგრამის ფარგლებში, სასურველ უნივერსიტეტში სწავლა მხოლოდ უნარების გამოცდის მშობლიურ ენაზე ჩაბარების საფუძველზე შეუძლიათ.
„სტუდენტებს მშობლიურ ენაზე გამოცდის წარმატებით ჩაბარების შემთხვევაში უფინანსდებათ სწავლა ქართული ენის მომზადების პროგრამაზე, რომლის დასრულების შემდგომ ისინი ასევე სრული დაფინანსებით აგრძელებენ სწავლას იმავე უმაღლეს საგანმანათლებლო პროგრამაზე“.
