მთავრობამ მაშინ სპეციალური პროგრამებიც შეიმუშავა – ვალუტის კურსის ცვლილების გამო ზოგიერთ სასურსათო პროდუქტზე ფასის ზრდის შესაჩერებლად და ცალკე – ხორბლის იმპორტის სუბსიდირებისთვის:
სახელმწიფო სურსათის მარაგის შექმნას ამ ეტაპზე არ აპირებს – უთხრეს „ბათუმელებს“ საქართველოს სოფლის მეურნეობის სამინისტროში. „ბოლო დღეებში გარკვეული პროდუქტების მიწოდებაში პრობლემები შეიქმნა. თუმცა ეს არ ნიშნავს იმას, რომ ეს პროდუქტები ქვეყანაში არ არის“, – განაცხადეს სამინისტროში.
მეწარმეები კი, რომლებიც შაქრის იმპორტზე მუშაობენ, „ბათუმელებთან“ ამბობენ, რომ უახლოეს მომავალში შესაძლოა ბაზარზე შაქრის დეფიციტი გაჩნდეს. ბევრ მაღაზიას კი შაქარი გაყიდვაში აღარ აქვს: „მივაკითხეთ საწყობს და შაქარი ვერ ავიღეთ, აღარ აქვთ. რაც შეეხება ფქვილს და ზეთს, შემომტანების თქმით, ჯერჯერობით მარაგები არის.“
„ბოლო ორი დღე დასავლეთ საქართველოში შაქარი არ იყო, მაგრამ ეს არ ნიშნავს იმას, რომ ქვეყანაში შაქარი არ არის. არის; იყო დისტრიბუციის/ლოჯისტიკის პრობლემა“, – გვითხრეს საქართველოს სოფლის მეურნეობის სამინისტროს პრესსამსახურში.
პრესსამსახურის ინფორმაციით, დღეს, 9 მარტს, სამინისტროში გაიმართა შეხვედრა მიმწოდებლებთან, მათ შორის, მსხვილი სუპერმარკეტების ქსელების წარმომადგენლებთან, სადაც ითქვა, რომ „ბოლო დღეებში მოთხოვნა სურსათზე 30 პროცენტით არის გაზრდილი, რამაც შექმნა პრობლემები ლოჯისტიკაში/მიწოდებაში, რაც უმოკლეს დროში გამოსწორდება.“
სამინისტროს მიერ გავრცელებული ინფორმაციით, მინისტრმა ოთარ შამუგიამ განაცხადა, რომ „მარაგების მხრივ არანაირი დეფიციტი არ არსებობს. შეხვედრაზე შევთანხმდით, რომ მაქსიმალურ კოორდინაციაში ვიმუშავებთ იმპორტიორებთან და მიმწოდებლებთან“.
შეხვედრაზე საქართველოს დისტრიბუტორთა ასოციაციის ხელმძღვანელმა, ივა ჭყონიამ განაცხადა, რომ „ამ ეტაპზე, ბაზარზე სტაბილური ვითარებაა, თუმცა ბოლო დღეებში, სავაჭრო ქსელებში მიწოდების მხრივ შეფერხებები დაფიქსირდა, რაც მოსახლეობის მხრიდან ჭარბ შესყიდვებს უკავშირდება და ხელოვნურად იწვევს დეფიციტს. გარკვეულ ბრენდებთან დაკავშირებული ჩავარდნები გამოწვეულია ლოგისტიკური ჯაჭვის წყვეტიდან, მაგრამ თუ დღეს გარკვეული ბრენდის ზეთი, წიწიბურა თუ შაქარი მომხმარებელს არ დახვდათ დახლზე, ეს არ ნიშნავს, რომ ორ-სამ დღეში არ იქნება, ამიტომ მოვუწოდებ მოსახლეობას, რომ ჭარბი შესყიდვებით არ დააზიანონ არც საკუთარი თავი და არც სხვა მომხმარებელი“.
სამინისტროს ინფორმაციით, ამავე შეხვედრაზე აღინიშნა, რომ „1-ლი აპრილიდან ქარხანა „აგარის შაქარი“ სრული დატვირთვით განაახლებს მუშაობას და ბაზარზე შაქრის შეუფერხებელი მიწოდება უზრუნველყოფილი იქნება“.
„ბათუმელებს“ სამინისტროში ასევე უთხრეს, რომ „არსებული სიტუაციის გამო ფასებით სპეკულაცია არ იქნება და თუ რამე გაძვირდება ეს, ძირითადად, ლარის კურსზე იქნება დამოკიდებული. სასურსათო პროდუქტები ქვეყანაში არის. მარაგების შექმნის აუცილებლობა არ დგას“.
სურსათის მარაგის შექმნა საქართველოს მთავრობამ ორი წლის წინ, პანდემიის დასაწყისში მიიჩნია საჭიროდ და ამისთვის რუსული და ბელარუსული შაქარი, ზეთი და მაკარონი იყიდა.
საქართველოს ხორბლისა და ფქვილის მწარმოებელთა ასოციაციის აღმასრულებელი დირექტორის, ლევან სილაგავას განცხადებით, ამ ეტაპზე რუსეთსა და უკრაინას შორის მიმდინარე ომმა გამოიწვია ბაზარზე ხორბლის ფასის ზრდა და მიწოდების ჯაჭვების მოშლა.
მისივე თქმით, მიუხედავად იმისა, საქართველო ჯერ კიდევ იღებს წარსულში დადებული კონტრაქტების საფუძველზე რუსულ ხორბალს, მომავალში საჭირო იქნება ახალი ბაზრების მოძიება, მათ შორის, ეს შეიძლება იყოს ევროპული და ყაზახური ბაზრები.
ამავე თემაზე:
—
2020 წელს, პანდემიის გამო, სახელმწიფომ მარაგისთვის ჯამში 4 232 800 აშშ დოლარის რუსული და ბელარუსული წარმოების პროდუქტები ორი კერძო კომპანიისგან ტენდერის გარეშე, პირდაპირი წესით შეისყიდა. ორივე კომპანია „ოცნების “ შემწირველია.
პანდემიის დაწყებიდან ორი თვის შემდეგ კი, სახელმწიფო მარაგისთვის ნაყიდი ზეთი და შაქარი მთავრობამ აუქციონზე გაყიდა. მარაგის ნაწილი კი, უსასყიდლოდ, შინაგან საქმეთა და თავდაცვის სამინისტროებს გადასცა.
მთავრობამ მარაგში დახარჯა 13 498 735 ლარი, ეს მარაგი კი გაცილებით იაფად – 12 319 936 ლარად გაყიდა, მათ შორის, „ქართული ოცნების“ შემწირველებზე, ან გასცა სახელმწიფო უწყებებზე.
ვრცლად:
მთავრობამ 13 მილიონად ნაყიდი ზეთი და შაქარი 12 მილიონად გაყიდა/გასცა
