„უახლოეს მომავალში შესაძლოა ბაზარზე შაქრის დეფიციტი გაჩნდეს“, – აცხადებენ მეწარმეები, რომლებიც ბათუმში შაქრის იმპორტზე მუშაობენ. სოფლის მეურნეობის სამინისტროში „ბათუმელებს“ უთხრეს, რომ ქვეყანაში შაქარი არის. რაც შეეხება ფქვილსა და ზეთს, შემომტანების თქმით, „ჯერჯერობით მარაგი არის“.
მომხმარებლების ინფორმაციით, ზოგიერთ ქსელში მხოლოდ ხუთი კილოგრამი შაქრის ყიდვა შეიძლება. პროდუქტის ბევრ მაღაზიას კი შაქარი გაყიდვაში საერთოდ აღარ აქვს: „მივაკითხეთ საწყობს და შაქარი ვერ ავიღეთ, აღარ აქვთ.“
ამ დროისთვის მაღაზიებში 1 კგ. შაქრის ფასი 2.90 ან სამი ლარია. თებერვლის დასაწყისში კი 1 კგ. შაქრის ფასი 2.60 ლარი იყო. მცირე მეწარმეების ინფორმაციით, თებერვლის დასაწყისში 1 ტომარა შაქარს 105 ლარად ყიდულობდნენ, ახლა კი ფასი 128 ლარია.
ლონდონის საფონდო ბირჟაზე შაქრის ღირებულება ტონაზე 536 დოლარია, რაც ერთი წლის განმავლობაში 17%-იან გაძვირებას გულისხმობს. შაქრის ასეთი მაღალი ფასი ბოლოს 2016 წელს იყო.
საქართველო შაქარს ძირითადად ბრაზილიიდან ყიდულობს. 2021 წელს საქართველოში 120.7 ათასი ტონა შაქარი შემოვიდა, იმპორტის საშუალო ფასი ტონაზე 499 დოლარი იყო. შესყიდული შაქრის თითქმის ნახევარი – 57 ათასი ტონა [28.2 მლნ] ბრაზილიიდან შემოვიდა, იმპორტში შემდეგ ადგილებზე თურქეთი და პოლონეთი არიან. უკრაინა საქართველოს შაქრის იმპორტში მერვე, ხოლო რუსეთი – მეთორმეტე ადგილზეა.
ამ დროისთვის მაღაზიებში 1 ლიტრი ზეთის ფასი 7.30 ლარია, ხოლო 1 კგ ფქვილი 3.5 ლარი ღირს. 24-კილოგრამიანი ტომარა ფქვილის ყიდვა 24 ლარად შეიძლება.
„ბოლო ორი დღე დასავლეთ საქართველოში შაქარი არ იყო, მაგრამ ეს არ ნიშნავს იმას, რომ ქვეყანაში შაქარი არ არის. არის. იყო დისტრიბუციის/ლოჯისტიკის პრობლემა, რაც გამოსწორდება“, – გვითხრეს საქართველოს სოფლის მეურნეობის სამინისტროს პრესსამსახურში.
სამინისტროს ინფორმაციით „1-ლი აპრილიდან ქარხანა „აგარის შაქარი“ სრული დატვირთვით განაახლებს მუშაობას და ბაზარზე შაქრის შეუფერხებელი მიწოდება უზრუნველყოფილი იქნება“.
