ჯერ კიდევ უცნობია, დატოვა თუ არა თანამდებობა ბათუმის სპორტული ცენტრის დირექტორმა თემურ ხასიამ მას შემდეგ, რაც მან გუშინ, 13 თებერვალს, ღამით, მიწისძვრის შემდეგ ფეისბუქში დაწერა: „ერთი ბიძგი და ავარიული სახლების პრობლემა მოხსნილი გვაქვს“.
თემურ ხასიას პოსტი
ამ სტატუსიდან რამდენიმე წუთის შემდეგ თემურ ხასიამ ფეისბუქზე დაწერა, რომ ბათუმის სპორტული ცენტრის დირექტორის თანამდებობას ტოვებს. საბოლოოდ მან ბოლო პოსტები წაშალა და ფეისბუქგვერდიც გააუქმა.
ბათუმში, ბოლო მონაცემებით, 3 ათასზე მეტი ოჯახი ცხოვრობს ავარიულ, სიცოცხლისთვის საშიშ სახლში.
დაწერა თუ არა განცხადება თანამდებობის დატოვების შესახებ თემურ ხასიამ? – „ბათუმელების“ სატელეფონო ზარს თემურ ხასიამ არ უპასუხა. ბათუმის სპორტული ცენტრის პრესცენტრში გვითხრეს, რომ თემურ ხასია სამსახურში დღეს არ მისულა და ფეისბუქპოსტის გარდა დამატებით არაფერი იციან.
ბათუმის მერიის პრესცენტრში ვერ გვითხრეს, დატოვა თუ არა თანამდებობა ხასიამ.
თემურ ხასია „ქართული ოცნების“ აქტივისტია. ის თანამდებობაზე ბათუმის მერმა, არჩილ ჩიქოვანმა დანიშნა ორი თვის წინ.
თემურ ხასია არჩილ ჩიქოვანთან ერთად
თემურ ხასიას, როგორც „ოცნების“ აქტივისტის შესახებ, „ბათუმელები“ 2019 წელს წერდა, როცა „ალტერნატივას“ ხელმძღვანელს, ხათუნა ბერიძეს პარლამენტის წევრი – ანზორ ბოლქვაძე სასტუმროს დატოვებას აიძულებდა. გავრცელებულ ვიდეოჩანაწერში ჩანდა თემურ ხასიაც, რომელიც ასევე მოუწოდებდა ხათუნა ბერიძეს სასტუმრო დაეტოვებინა.
იმ პერიოდში თემურ ხასია ბათუმის მერიის საქალაქო და ინფრასტრუქტურის სამმართველოს მარკეტინგისა და პიარის სამსახურის თანამშრომელი იყო და „ქართული ოცნებიდან“ ხულოს მერობის კანდიდატის, ვახტანგ ბერიძის წინასაარჩევნო კამპანიაში იყო ჩართული.
