ხვალ, 23 დეკემბერს, ბათუმის საკრებულოს სხდომა გაიმართება. განცხადება სხდომის მოწვევის თაობაზე საკრებულოს აპარატმა ოპოზიციის მოთხოვნით გაავრცელა.
ასვე ოპოზიციის მოთხოვნით, სხდომის დღის წესრიგი ორი საკითხის კენჭისყრას ითვალისწინებს. ეს საკითხებია: საკრებულოს თავმჯდომარის არჩევა და 2021 წლის ბიუჯეტის დამტკიცების შესახებ წინა მოწვევის საკრებულოს მიერ მიღებული დადგენილების ბათილად ცნობა.
სხდომის გამართვისთვის საჭიროა კვორუმი შედგეს, ამისთვის კი სხდომას საკრებულოს 18 წევრი მაინც უნდა დაესწროს.
ბათუმის საკრებულოში 35 წევრია, აქედან 16 წევრი „ოცნებას“ წარმოადგენს. ამ დროისთვის არ გვაქვს პასუხი, დაeსწრებიან თუ არა სხდომას „ოცნების“ წევრები.
14 წევრი ჰყავს საკრებულოში „ერთიან ნაციონალურ მოძრაობას“, 2 – „გახარია საქართველოსთვის“, 1 – „ლელოს“ და 1 დამოუკიდებელი დეპუტატია, გახარიას პარტიის ყოფილი წევრი.
ხვალ საკრებულოს სხდომას დაესწრება გახარიას პარტიის 1 წევრი – აკაკი გვიანიძე. „გახარია – საქართველოსთვის“ პარტიის წევრები ბათუმის საკრებულოს პირველ სხდომას არ დასწრებიან.
საერთო ჯამში ოპოზიცია სრულად რომ გაერთიანდეს, ასევე, დამოუკიდებელმა წევრმაც რომ მიიღოს გადაწყვეტილება ოპოზიციის სასარგებლოდ, 17 ხმით თავმჯდომარის დამტკიცებას ვერც ოპოზიცია შეძლებს და ვერც „ოცნება“, რადგან კოდექსი თავმჯდომარის ასარჩევად საკრებულოს სიითი შემადგენლობის ნახევარზე მეტის მხარდაჭერას ითვალისწინებს.
_______________
ფოტოზე: ბათუმის ახალი მოწვევის საკრებულოს პირველი სხომა
