Batumelebi | „ზეწოლა, მოსყიდვა, დაშინება“ – რას წერენ ბათუმში კომისიის წევრები შემაჯამებელ ოქმებში „ზეწოლა, მოსყიდვა, დაშინება“ – რას წერენ ბათუმში კომისიის წევრები შემაჯამებელ ოქმებში – Batumelebi
RU | GE  

„ზეწოლა, მოსყიდვა, დაშინება“ – რას წერენ ბათუმში კომისიის წევრები შემაჯამებელ ოქმებში

ქალაქის მერის არჩევნების მეორე ტურში ბათუმის 105 საარჩევნო უბანზე შედგენილ შემაჯამებელ ოქმებში განსხვავებული აზრი 24 ოქმშია დაფიქსირებული. განსხვავებული აზრის ავტორები ძირითადად „ერთიანი ნაციონალური მოძრაობის“ წარმომადგენლები არიან კომისიაში.

ოქმებში ყველა ჩანაწერის შინაარსი ერთია – განსხვავებული აზრის მქონე კომისიის წევრები არ ცნობენ არჩევნების იმ შედეგებს, რაც საბოლოოდ დაფიქსირდა ოქმში და ამის სხვადასხვა მიზეზს ასახელებენ.

მაგალითად:

  • „არასამართლიანი წინასაარჩევნო გარემო“;
  • „ენმ-ს ხმები ბათილდებოდა სისტემატურად და მიკერძოებულად“;
  • „მოსყიდვა არჩევნების დღეს და ამომრჩევლის ნების მანიპულაცია“;
  • „პროცედურული დარღვევები“;
  • „უბნის მიმდებარე ტერიტორიაზე შეიმჩნეოდა საეჭვო პირები“;
  • „ზეწოლა დამკვირვებლებზე“;
  • „მოსყიდვის, დაშინების და ზეწოლის პირობებში შეუძლებელია ოქმის მონაცემები ასახავდეს ამომრჩევლის ნებას“;
  • „ვინაიდან ქართული ოცნების კოორდინატორები და აქტივისტები ზეწოლას ახდენდნენ ამომრჩევლებზე, არ ვეთანხმები შემაჯამებელ ოქმს“ და სხვა.

ბათუმის N13 საარჩევნო უბნის შემაჯამებელი ოქმიდან

ბათუმის N49 საარჩევნო უბნის შემაჯამებელი ოქმიდან

ზოგიერთ შემაჯამებელ ოქმში კი კომისიის წევრი წერს, რომ არ ეთანხმება შედეგებს, თუმცა, არც მიზეზს ასახელებს:

ბათუმის N33 საარჩევნო უბნის შემაჯამებელი ოქმიდან

N16 საარჩევნო უბნის კომისიის წევრი მარიამ გათენაძე შემაჯამებელი ოქმის განსხვავებული აზრისთვის განკუთვნილ გრაფაში წერს, რომ „ხმების გადათვლისას აღმოჩნდა 1 ცარიელი კონვერტი და 1 ზედმეტი ბიულეტენი, რაც იწვევს საფუძვლიან ეჭვს, რომ უბანზე დატრიალდა კარუსელი“.  ამიტომ, ის თვლის, რომ ამ უბანზე შედეგები ბათილად უნდა გამოცხადდეს.

ბათუმის N16 საარჩევნო უბნის შემაჯამებელი ოქმიდან

„ბათუმელებმა“ გადაამოწმა ბათუმის 105-ივე უბნის შემაჯამებელი ოქმი, რაც ცესკოს ოფიციალურ გვერდზეა ატვირთული.

N16 საარჩევნო უბანზე შედგენილი შემაჯამებელი ოქმის მიხედვით, უბანზე ხმა მისცა 890-მა ამომრჩეველმა. აქედან გიორგი კირთაძემ – 409, ხოლო არჩილ ჩიქოვანმა 456 ხმა მიიღო, გაბათილდა 26 ბიულეტენი. შესაბამისად ბიულეტენების რაოდენობა ჯამში არის 891, ანუ, ამ უბანზე მისული ამომრჩევლების რაოდენობაზე [890] ერთით მეტი.

რამდენიმე უბანზე ხმის დათვლის შემდეგ ბიულეტენების რაოდენობა უბანზე მისული ამომრჩევლების რაოდენობაზე ნაკლები აღმოჩნდა.

ჩვენს მიერ ოქმების გადამოწმებით, მაგალითად, 4-4 ბიულეტენით ნაკლები აღმოჩნდა 39-ე და 99-ე უბნებზე, 2 ბიულეტენი დააკლდათ 88-ე უბანზე, ხოლო თითო ბიულეტენით ნაკლები აღმოჩნდა მე-4, 31, 36, 47, 48 და 69-ე უბნებზე.

მიუხედავად იმისა, რომ 30 ოქტომბრის არჩევნებზე ახალი დიზაინის ხმის მიცემის კაბინები იყო განთავსებული, 54-ე უბნის კომისიის წევრი, ირინე კოტრიკაძე, შემაჯამებელ ოქმში მიუთითებს, რომ „იღებდნენ სურათებს ხელმოწერილ ბიულეტენებზე, რაც იწვევს ეჭვს, რომ ხდებოდა ზეწოლა ამომრჩევლებზე“:

ბათუმის N54 საარჩევნო უბნის შემაჯამებელი ოქმიდან

საქართველოში ხმის მიცემა ფარულია და შესაბამისი კანონით კენჭისყრის კაბინაში ფოტო და ვიდეოგადაღება აკრძალულია.

ცენტრალური საარჩევნო კომისიის წინასწარი მონაცემებით, ბათუმის მერის არჩევნებში „ქართული ოცნების“ კანდიდატმა არჩილ ჩიქოვანმა 38 236 ხმა [51.018%] მიიღო, ხოლო „ნაციონალური მოძრაობის“ კანდიდატმა გიორგი კირთაძემ 1 526 ხმით ნაკლები, ანუ 36 710 [48.982%] ხმა მიიღო.

ბათუმის #79 საარჩევნო ოლქის მონაცემებით, 30 ოქტომბრის არჩევნების მეორე ტურზე ბათუმის საარჩევნო უბნებზე 2071 ბიულეტენი იქნა ბათილად ცნობილი, დაწერილია 21 საჩივარი.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com