Batumelebi | ბათუმში 2071 ბიულეტენია ბათილად ცნობილი – ოპოზიცია საჩივარს ამზადებს ბათუმში 2071 ბიულეტენია ბათილად ცნობილი – ოპოზიცია საჩივარს ამზადებს – Batumelebi
ნეტგაზეთი • RU

ბათუმში 2071 ბიულეტენია ბათილად ცნობილი – ოპოზიცია საჩივარს ამზადებს

ბათუმში ოპოზიცია აცხადებს, რომ საჩივარს ამზადებენ ბათუმში არჩევნების მეორე ტურის შედეგებთან დაკავშირებით. ამის შესახებ „ბათუმელებს“ მირდატ ქამადაძემ უთხრა, „ერთიანი ნაციონალური მოძრაობის“ ბათუმის ორგანიზაციის წევრმა, თუმცა ის ჯერჯერობით არ აკონკრეტებს, რას შეეხება საჩივარი.

ოპოზიცია აცხადებს, რომ „ოცნების“ დავალებით, საარჩევნო უბნებზე ბათილად მიიჩნიეს ის ბიულეტენები, სადაც ამომრჩევლის ნება მკაფიოდ იყო გამოხატული გიორგი კირთაძის სასარგებლოდ.

ბათუმის #79 საარჩევნო ოლქის მონაცემებით, 30 ოქტომბრის არჩევნების მეორე ტურზე ბათუმის საარჩევნო უბნებზე 2071 ბიულეტენი იქნა ბათილად ცნობილი, დაწერილია 21 საჩივარი.

ცესკოს წინასწარი მონაცემებით, „ოცნების“ კანდიდატმა არჩილ ჩიქოვანმა 1526 ხმის სხვაობით მოუგო არჩევნები „ერთიანი ნაციონალური მოძრაობის“ და ერთიანი ოპოზიციის კანდიდატს, გიორგი კირთაძეს.

„თეთრზე შავიაო, გვიმტკიცებენ, ისეთი ბიულეტენები ჩათვალეს ბათილად და ისეთი ბიულეტენები ჩაუთვალეს ოცნებას. ორმაგი სტანდარტი გვაქვს სახეზე. 8 საათზე უბნები რომ იკეტება არჩევნების დღეს და რა პროცედურითაც მიმდინარეობს უბნების დათვლა, ასე უნდა მოხდეს მთლიანად ბათუმის გადათვლა. თუ ამას მივაღწევთ, ამ შემთხვევაში დარწმუნებული ვართ, შედეგი შეიცვლება.

ვამზადებთ საჩივარს და დეტალები მალე გახდება ცნობილი“ – ამბობს მირდატ ქამადაძე.

მისივე თქმით, 30 ოქტომბრის არჩევნების მეორე ტურზე იყო შემთხვევები, როცა დათვლისას სხვა უბნის ბიულეტენი ამოვიდა საარჩევნო უბანზე, რაც, მისი თქმით, კარუსელზე მიუთითებს. მირდატ ქამადაძე ამბობს, რომ ასეთი შემთხვევა იყო ბათუმის #86 საარჩევნო უბანზე, სადაც #37 საარჩევნო უბნის ბიულეტენი ამოვიდა დათვლისას.

„ერთიანი ნაციონალური მოძრაობის“ ლიდერმა და ოპოზიციის თბილისის მერობის კანდიდატმა ნიკა მელიამ დღეს, 31 ოქტომბერს, თბილისში აქცია დააანონსა. „ბრძოლა გუშინ არათუ არ დასრულებულა, არამედ ბრძოლა დაიწყო“ – აცხადებს ნიკა მელია.

____________

ფოტოზე: ადგილობრივი თვითმმართველობის არჩევნების მეორე ტური ბათუმში, საარჩევნო უბანი

ამავე თემაზე: 

„II ტური არის გაშვებული შესაძლებლობა დემოკრატიული განვითარების გზაზე“ – ISFED

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com