სახელმწიფო აუდიტის სამსახური წერს, რომ ე.წ. სისხლიანი ბანერების განთავსებაზე ჩატარებული მოკვლევის შედეგად დარღვევა ვერ აღმოაჩინა. ბანერები წარწერით: „არა ნაცებს, არა ბოროტებას, არა ღალატს“ შპს „ალმას“ ბილბორდებზე თვითმმართველობის არჩევნებამდე გამოჩნდა.
ბანერზე პოლიტიკოსებთან ერთად მედიამენეჯერებიც იყვნენ გამოსახული. ეს ბანერები 2021 წლის სექტემბერში ქვეყნის მასშტაბით გარე რეკლამისათვის განკუთვნილ ადგილებში
განათავსეს. ამ გზით ამომრჩეველს რამდენიმე პოლიტიკური ძალის მხარდაჭერისგან თავის შეკავებისკენ მოუწოდეს.
აუდიტის სამსახურმა ბანერების განთავსებიდან მალევე განაცხადა, რომ ბანერების განთავსების მიზნით გაწეული ხარჯის კანონიერების დასადგენად ადმინისტრაციული წარმოება დაიწყო. ამ მიზნით სახელმწიფო აუდიტის სამსახურმა ბანერების განთავსებაზე გაწეული ხარჯის შესახებ ინფორმაცია გამოითხოვა ბანერების განთავსების ადგილების მფლობელი კომპანიისგან.
2022 წლის თებერვალში გამოქვეყნებულ ანგარიშში აუდიტი წერს, რომ შესწავლის შედეგად, „ხარჯის კანონმდებლობით დადგენილი მოთხოვნების დარღვევით განხორციელების ფაქტი არ გამოვლენილა“.
სისხლიანი ბანერების განთავსებისთვის თანხა ბიზნესმენმა მიხეილ გაბრიაძემ გადაიხადა.
