„არჩევნების დღეს გამოვლენილი პირთა საეჭვო შეკრებების, ამომრჩეველთა სავარაუდო მოსყიდვის, მობილიზებისა და აღრიცხვის ფაქტები ნეგატიურად აისახა ამომრჩევლის თავისუფალი ნების გამოვლენაზე, რასაც ზოგიერთ მუნიციპალიტეტში, მცირე სხვაობის პირობებში, შესაძლოა შედეგებზე ზეგავლენა მოეხდინა“ – აცხადებს ორგანიზაცია „სამართლიანი არჩევნები“ – ISFED, რომლის 1457 წარმომადგენელი აკვირდებოდა 30 ოქტომბერს გამართულ თვითმმართველობის არჩევნების მეორე ტურს.
არჩევნების დღის შემაჯამებელი პრესრელიზი ორგანიზაციამ დღეს, 31 ოქტომბერს გამოაქვეყნა.
„სამართლიანი არჩევნები მიიჩნევს, რომ არჩევნების მეორე ტური არის გაშვებული შესაძლებლობა ქვეყნის დემოკრატიული განვითარების გზაზე“ – აცხადებს ორგანიზაცია შემაჯამებელ შეფასებაში.
„კენჭისყრის პროცესის დროს განსაკუთრებით საგულისხმო იყო მარკირების მქონე პირთა მიერ ხმის მიცემის, კენჭისყრაში განმეორებით მონაწილეობისა და მარკირების შემოწმების/გაკეთების პროცედურების დარღვევების ფაქტები.
ასევე, დაფიქსირდა ამომრჩეველთა სიებთან და გადასატან საარჩევნო ყუთთან დაკავშირებული არაერთი დარღვევა. სამწუხაროდ, დღის განმავლობაში ადგილი ჰქონდა დამკვირვებლებისა და ჟურნალისტების მიმართ შეურაცხყოფისა და მათზე ზეწოლის შემთხვევებს.
რაც შეეხება ხმის დათვლისა და შედეგების შეჯამების პროცესს, ორგანიზაციას ამ მხრივ მნიშვნელოვანი ხარვეზები არ გამოუვლენია. თუმცა, დაფიქსირდა ბიულეტენების არასწორად ან/და სავარაუდოდ მიზანმიმართულად გაბათილების შემთხვევები.
არჩევნების დღეს გამოვლენილი ტენდენციების ერთობლიობამ დააზიანა საარჩევნო პროცესების მიმართ ნდობა“ – ვკითხულობთ ორგანიზაციის მიერ გამოქვეყნებულ ინფორმაციაში.
ადგილობრივი თვითმმართველობის არჩევნების მეორე ტურში „სამართლიანმა არჩევნებმა“ 161 საჩივარი დაწერა და 22 შენიშვნა დააფიქსირა ჩანაწერთა წიგნში.
_______________
ფოტოზე: ადგილობრივი თვითმმართველობის არჩევნების მეორე ტური ბათუმში, საარჩევნო უბანი
