ბათუმი-ახალციხის მაგისტრალზ,ე დაბა შუახევთან, ავტომობილების მოძრაობა შეფერხებულია. „ბათუმელებს“ ერთ-ერთმა მგზავრმა უთხრა, რომ შეფერხების მიზეზი, როგორც მათ უთხრეს, გზაზე მიმდინარე სამუშაოებია:
„არის საცობი, თითქმის ნახევარი საათი ვიდექით, გვითხრეს, რომ კიდევ საათ-ნახევარი მოგვიწევდა ლოდინი, თუმცა ახლა [16:00 სთ.] მოძრაობა ცალმხრივად გახსნეს. ბათუმიდან ხულოს მიმართულებით ამ დროისთვის მანქანები გადაადგილდება; ხულოდან ბათუმის მიმართულებით კი, მოძრაობა კვლავ შეჩერებულია. მოწყობილია დროებითი გზა, რომელიც გვერდს უვლის იმ ადგილს, სადაც კლდე ააფეთქეს და სამუშაოები მიდის.“
ბათუმი-ახალციხის ავტომაგისტრალზე შეფერხებები სხვადასხვა ადგილზე და სხვადასხვა პერიოდულობით ამ ბოლოს ხშირია. საქართველოს საავტომობილო გზების დეპარტამენტი შეფერხებების შესახებ ინფორმაციას თავის ვებგვერდზე წინასწარ აქვეყნებს, თუმცა, დეპარტამენტის გვერდზე, 29 აგვისტოს ამ გზაზე მოძრაობის დროებით შეზღუდვის შესახებ ინფორმაცია არ დევს.
თვითმხილველის თქმით, მოძრაობას აქ საპატრულო პოლიცია არეგულირებს.
