ხულოში ნაპრალები გაჩნდა ბათუმი-ახალციხის ავტომაგისტრალზე

ბათუმი-ახალციხის ავტომაგისტრალზე, კერძოდ, დაბა ხულოდან გზის დაახლოებით მეხუთე კილომეტრზე, ნაპრალები გაჩნდა.

ეს გზა ორი წლის წინ შეაკეთეს. ადგილობრივების დაკვირვებით, ნაპრალები გზაზე საკმაოდ ღრმაა და შესაძლოა ის მეწყრის საფრთხეებზე მიანიშნებდეს, იმის გათვალისწინებით, რომ გზის აღნიშნულ მონაკვეთთან ახლოს მეწყერი 2023 წელს ჩამოწვა.

ბათუმი-ახალციხის ავტომაგისტრალის ხულო-გოდერძის მონაკვეთი. ფოტო/”ბათუმელები” /18.03.2025

„ბათუმელები“ შეეცადა ხულოს მერიის პრესსამსახურიდან ინფორმაციის მიღებას – ხომ არ მიუმართავს მუნიციპალიტეტს შესაბამისი სამსახურებისთვის და ხომ არ მიმდინარეობს გზის ამ მონაკვეთის შესწავლა გეოლოგების მიერ, თუმცა ხულოს მერიის პრესსამსახურში ჩვენს ზარებს არ უპასუხეს.

რაც შეეხება უშუალოდ გზას, აღნიშნული ავტომაგისტრალის მოვლა-შენახვაზე პასუხისმგებელი საქართველოს საავტომობილო გზების დეპარტამენტია.

„ინფორმირებულები ვართ. დავალება უკვე გაცემულია და შეავსებენ [ნაპრალებს] ამ უახლოეს პერიოდში“, – მოგვწერეს დეპარტამენტის პრესსამსახურიდან.

კითხვაზე, ხომ არ არის აუცილებლობა ტერიტორია გეოლოგებმა შეისწავლონ, ან ხომ არ შეუსწავლიათ უკვე, გზების დეპარტამენტში გვიპასუხეს, რომ მიმდინარეობს დაკვირვება.

ხულო-გოდერძის გზა ბათუმი-ახალციხის ავტომაგისტრალის ის ნაწილია, რომელსაც საქართველოს გზების დეპარტამენტი 2018 წლიდან აკეთებს. საუბარია ხულო-ზარზმის გზის პროექტზე, რომელიც წესით 2020 წელს მთლიანად უნდა დასრულებულიყო და დღემდე დაუმთავრებელია.

ამავე თემაზე: