საქართველოში კორონავირუსის მართვაში ჩაერთო საველე ჰოსპიტალი დიღომში – ინფორმაცია ამის შესახებ თამარ გაბუნიამ დაადასტურა, საქართველოს ჯანდაცვის მინისტრის მოადგილემ.
„გუშინ საღამოს დადგა იმის აუცილებლობა, რომ დაგვეწყო საველე ჰოსპიტლის ოპერირება. 9 პაციენტი განთავსდა საველე ჰოსპიტალში, მათი მდგომარეობა არის საშუალო სიმძიმის.
ჰოსპიტალი დღეიდან უკვე სრული დატვირთვით შეუდგება ფუნქციონირებას დიღომში“ – განაცხადა თამარ გაბუნიამ.
მისი განმარტებით, საველე ჰოსპიტალი ძირითადად გამოყენებული იქნება დროებითი დაყოვნებისთვის.
„ჩვენთვის მთავარია მოხდეს პაციენტის სტაბილიზაცია და შემდეგ მისი გადამისამართება. ვფიქრობთ, 2-3 დღეზე მეტი არ უნდა მოგვიხდეს პაციენტის დაყოვნება, შემდეგ მოხდება მისი გადაყვანა სასტუმროში ან სხვა ჰოსპიტალში,“ – განაცხადა მინისტრის მოადგილემ.
თამარ გაბუნიას თქმით, ამჟამად ჰოსპიტალური სექტორი მუშაობს მაქსიმალური დატვირთვით, კოვიდკლინიკებში ადგილები თავისუფლდება ძირითადად ბრუნვის ხარჯზე.
