ნეტგაზეთი • RU

კოვიდით ხელახლა ინფიცირების მინიმალური ვადა 60 დღეა – NCDC

2020 წლის თებერვლიდან 2022 წლის ივლისამდე საქართველოში აღირიცხა COVID 19-ით რეინფიცირების ანუ ხელახლა ინფიცირების 138 331 შემთხვევა. საშუალო პერიოდი პირველსა და ბოლო დადასტურებებს შორის არის 305 დღე, მინიმალური – 60, მაქსიმალური კი – 767 დღე. ამის შესახებ დაავადებათა კონტროლისა და საზოგადოებრივი ჯანმრთელობის ეროვნული ცენტრის [NCDC] უახლეს ანგარიშში წერია.

წინა ანგარიშის მიხედვით, COVID 19-ის პირველსა და მეორე დადასტურებებს შორის ყველაზე მოკლე ვადა 69 დღე იყო.

138 331 შესაძლო რეინფიცირების შემთხვევიდან 101 306 [73%] შემთხვევაში რეინფიცირება დადგა აუცრელ პირებში. „კოვიდის საწინააღმდეგო იმუნიზაცია პირველად და განმეორებით ინფიცირებას შორის ჩაუტარდა 37 025 [27%] ადამიანს: მათ შორის ერთი ბუსტერ დოზა მიღებული ჰქონდა რეინფიცირებულთა 2.3%-ს [3 213], ხოლო ოთხი დოზა – 0.035%-ს [49]“, – წერია ანგარიშში.

2021 წლის 15 მარტიდან 2022 წლის პირველ ივლისამდე რეინფიცირებულთა შორის 16 868 შემთხვევაში იყო ჰოსპიტალიზაცია, მათგან 102 პირი გარდაიცვალა. აღწერილი შემთხვევებიდან გარდაცვლილთა საშუალო ასაკი იყო 69 წელი, მინიმალური – 18 წელი, ხოლო მაქსიმალური – 89 წელი.

ანგარიშის მიხედვით, რეინფიცირებულთა შორის კაცი იყო 53 194 [38%], ხოლო ქალი – 85 137 [62%]. COVID 19-ის შესაძლო რეინფიცირების შემთხვევების მაჩვენებელი 100 000 მოსახლეზე ყველაზე მაღალია 30-39 წლის ქალებში.

მსოფლიო მასშტაბით, ამ ეტაპზე სახეზეა SARS-CoV-2-ის სხვადასხვა ვარიანტით დაინფიცირებისა და COVID 19-ით რამდენჯერმე დაავადების სურათი.

საანგარიშო პერიოდში აღრიცხული რეინფიცირების სავარაუდო და დადასტურებული შემთხვევების 92% საქართველოში SARS-CoV-2-ის ომიკრონის ვარიანტების [უპირატესად BA 1, BA 2] გავრცელებას უკავშირდება.

ამავე თემაზე:

რეგიონებში ყველაზე მეტი მედმუშაკი იმერეთსა და აჭარაში დაინფიცირდა – კოვიდი 6 თვეში

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან