საქართველოში საჰაერო გზით ჩამოსული უცხო ქვეყნის მოქალაქე, რომელსაც ნებისმიერი ვაქცინის 1 დოზა აქვს გაკეთებული, ქვეყანაში შემოსვლისას არ ექვემდებარება კარანტინს იმ შემთხვევაში, თუ მას კოვიდინფექცია გადატანილი აქვს ბოლო 100 დღის პერიოდში.
ამასთან, COVID-ინფექციის გადატანა დადასტურებული უნდა იყოს PCR დადებითი ტესტით, ვაქცინა კი უნდა იყოს ჯანმოს მიერ გადაუდებელი ავტორიზაციამინიჭებული.
ამ შემთხვევაში დაინფიცირებისა და აცრის თანმიმდევრობას მნიშვნელობა არ აქვს, თუმცა აცრიდან გასული უნდა იყოს არანაკლებ 14 დღე.
ამ დრომდე სავალდებულო კარანტინისგან საჰაერო გზით ჩამოსული ის მოქალაქეები თავისუფლდებოდნენ, რომლებსაც ვაქცინის ორი დოზა [johnson&Johnson ვაქცინაციის შემთხვევაში კი ერთი დოზა] ჰქონდათ გაკეთებული.
სახმელეთო და საზღვაო გზით ქვეყანაში ვაქცინის 1 დოზით შემოსულმა უცხოელმა კი, სავალდებულო კარანტინი რომ არ გაიაროს, ვაქცინაციის დამადასტურებელ დოკუმენტთან ერთად, საზღვარზე საქართველოში ვიზიტამდე ბოლო 72 საათში ჩატარებული PCR ტესტის ნეგატიური პასუხიც უნდა წარადგინოს.
ძალაში კვლავ რჩება ერთი გამონაკლისი – „ინდოეთის რესპუბლიკიდან მომავალი ნებისმიერი პირი [მოქალაქეობისა და ვაქცინაციის ქონის მიუხედავად], ასევე პირები, რომლებსაც აქვთ უკანასკნელი 14 დღის განმავლობაში ინდოეთის რესპუბლიკაში მოგზაურობის ისტორია, ექვემდებარებიან საქართველოში ვიზიტამდე ბოლო 72 საათში ჩატარებული PCR ტესტის ნეგატიური პასუხის წარდგენას საზღვარზე და შემდგომ − სავალდებულო 14-დღიან კარანტინს [უცხოელის შემთხვევაში, საკუთარი ხარჯით]“.
შეიცვალა უცხო ქვეყნის მოქალაქე სტუდენტების საქართველოში შემოსვლის პროცედურებიც:
ისინი „საქართველოში შემოსვლისას საზღვარზე წარადგენენ ნებისმიერი ტიპის კოვიდვაქცინის სრული კურსის [ორი დოზა, ხოლო johnson&Johnson ვაქცინაციის შემთხვევაში − ერთი დოზა] დამადასტურებელ დოკუმენტს ან უცხო ქვეყნის მოქალაქეები, რომლებსაც ბოლო 100 დღის პერიოდში გადატანილი აქვთ COVID-ინფექცია [დადასტურებული პჯრ დადებითი ტესტით], ჯანმოს მიერ გადაუდებელი ავტორიზაციამინიჭებული ნებისმიერი ვაქცინის ერთი დოზით [დაინფიცირებისა და აცრის თანმიმდევრობას არ აქვს მნიშვნელობა; აცრიდან გასულია 14 დღე] ვაქცინაციის დამადასტურებელ დოკუმენტს, ხოლო ინდოეთის რესპუბლიკიდან მომავალი უცხოელი სტუდენტები [მიუხედავად მოქალაქეობისა და ვაქცინაციის ჩატარებისა] კი, დამატებით წარადგენენ საქართველოში ვიზიტამდე ბოლო 72 საათში ჩატარებული PCR ტესტის ნეგატიურ პასუხს და ექვემდებარებიან 14-დღიან სავალდებულო კარანტინს.“
გადაწყვეტილება – რომ ქვეყანაში შემოსვლისას პირებზე, რომლებსაც გადატანილი აქვთ COVID-19 და არიან ერთჯერადად ვაქცინირებულები, საზღვრის კვეთისას გავრცელდება იგივე რეგულაცია, რაც 2 დოზით აცრილ პირებზე – მთავრობამ 2021 წლის 9 აგვისტოს მიიღო.
ამავე თემაზე:
PCR ტესტი ან იზოლაცია – საქართველოს აცრილი მოქალაქეების ქვეყანაში დაბრუნების წესი
