ხელვაჩაურის საკრებულოს წევრმა „ნაციონალური მოძრაობიდან“, მიშა ბოლქვაძემ აქტივისტებთან ერთად დღეს, 15 ივლისს, აჭარის მთავრობის თავმჯდომარეს, თორნიკე რიჟვაძეს, მწნილი და ღვინო მიუტანა მთავრობის სახლთან. აქტივისტების თქმით, გუშინ თორნიკე რიჟვაძე „ქართული ოცნების“ წარმომადგენლებთან ერთად რესტორანში ქეიფობდა. „ნაბახუსევზე იქნება დღეს და მოუხდება მწნილი და ღვინო“, – ამბობს მიშა ბოლქვაძე.
„მაშინ, როცა მთელი ქვეყანა დაღუპულ ოპერატორს გლოვობს, ქვეყანაში ადამიანები შიმშილობენ, როცა უნიათო ხელისუფლებამ ეკონომიკურ კრიზისში შეიყვანა ქვეყანა და სამუშაო დააკარგვინა ათასობით ადამიანს, მთავრობის თავმჯდომარე რესტორანში ქეიფობს „ოცნების“ წევრებთან ერთად,“ – ამბობს მიშა ბოლქვაძე.
აქციის მონაწილეებმა მთავრობის სახლთან გარდაცვლილი ოპერატორის ლექსო ლაშქარავას ფოტოებიც მიიტანეს.
ბოლქვაძის თქმით, აჭარისწყალზე რესტორანში გუშინ თორნიკე რიჟვაძემ ყოფილი პოლიციელი მერობის კანდიდატად წარუდგინა მმართველი პარტიის წევრებს.
„სწორედ ამას აღნიშნავდნენ რესტორანში. 80-მდე ადამიანი იყო დაპატიჟებული – მოქმედი დეპუტატები, მერიის თანამშრომლები, აიპის ხელმძღვანელები, სამსახურის უფროსები, კულტურის სახლის, ბაღების წარმომადგენლები, ყველა ჰყავდათ მიპატიჟებული და ჭიქით ხელში წარუდგინეს ზაზა დიასამიძე, ყოფილი პოლიციელი, მერობის კანდიდატად, რომელიც ახლა სოფლის მეურნეობის სამინისტროში მუშაობს. მე როგორც ვიცი, ეს შეხვედრა ბიუჯეტის ხარჯზეა გაკეთებული, ამიტომ გამოვითხოვ დოკუმენტებს“, – ამბობს მიშა ბოლქვაძე.
ბოლქვაძის თქმით, რესტორანში არც კოვიდრეგულაციები იყო დაცული.
