Batumelebi | დაწყებითის მასწავლებლებს გარემოსა და აგრარულ საკითხებში გადაამზადებენ დაწყებითის მასწავლებლებს გარემოსა და აგრარულ საკითხებში გადაამზადებენ – Batumelebi
RU | GE  

დაწყებითის მასწავლებლებს გარემოსა და აგრარულ საკითხებში გადაამზადებენ

მასწავლებლის პროფესიული განვითარების ეროვნული ცენტრის ინფორმაციით, დაწყებითი საფეხურის ყველა მასწავლებელს გადაამზადებენ გარემოს დაცვისა და აგრარული საკითხების მიმართულებით.

მასწავლებელთა სახლის ხელმძღვანელი ბერიკა შუკაკიძე ამბობს, რომ მასწავლებლების გადამზადებისთვის შეიქმნება დამატებითი რესურსები, მათ შორის რვა სახელმძღვანელო. თუმცა როდის, არ აკონკრეტებს. ასევე უცნობია, როდის დაიწყება და რამდენ ხანს გაგრძელდება მასწავლებლების ტრენინგები.

როგორც მასწავლებლის სახლში გვეუბნებიან, აგრარული საკითხების ერთ-ერთი თემაა, როგორ მოჰყავთ ბიოპროდუქტები.

„ბათუმელების“ კითხვაზე, თუ რატომ გადაწყდა ამ სფეროში მასწავლებლების გადამზადება, ცენტრში გვეუბნებიან, რომ ეს „გარემოსდაცვითი განათლების ნაწილია“ და ეროვნულ სასწავლო გეგმაში (ესგ-ში) გამჭოლი კომპეტენციის თემად არის განსაზღვრული. „არის ასაკისთვის შესაფერისი სახალისო აქტივობებით დატვირთული წიგნი“-გვეუბნებიან ცენტრში.

ცენტრის ინფორმაციით, თანამშრომლობის მემორანდუმი მასწავლებლის სახლსა და გარემოსდაცვითი ინფორმაციისა და განათლების ცენტრს შორის დღეს, 25 მაისს, გაფორმდა.

გარემოსდაცვით და აგრარულ საკითხებზე ელექტრონული სახელმძღვანელო იხილეთ აქ.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com